सन्धिखर्क : भारतबाट फर्किएका १६ जनालाई क्वारेन्टाइनमा राखिएको छ । रोजगारी गरी भारतबाट फर्किएका १६ जनालाई सन्धिखर्कको हटारीनेटामा निर्माण गरिएको क्वारेन्टाइन कक्षमा राखिएको जिल्ला अस्पताल अर्घाखाँचीका प्रमुख डाक्टर कपिल गौतमले बताए ।
९ जना घरमा पुगेर उपचारको लागि आएका र ७ जना घरमै पुग्न नपाएका सीमानामा अलपत्र परेका उद्धार गरी ल्याइएका गरी १६ जनालाई राखिएको उनले बताए ।
भारत-नेपाल नाका कृष्णनगरबाट कपिलवस्तु प्रशासनले पथ्थरकोटसम्म पुर्याएपछि अर्घाखाँची प्रशासनले बिहीबार सन्धिखर्क ल्याएर हटारीनेटाको क्वारेन्टाइनमा राखेको हो । उनीहरुलाई १४ दिनसम्म क्वारेन्टाइनमा राखेर निगरानी गरिने सहायक प्रमुख जिल्ला अधिकारी विष्णुराज बेल्वासेले बताए ।
रोजगारीका लागि भारत गएका उनीहरु मंगलबार भारतको लुधियानाबाट आएका थिए । सात जनामध्ये ६ जना भुमिकास्थान नगरपालिका र एक जना सन्धिखर्क नगरपालिकाका रहेका छन् । उपचारकालागि जिल्ला अस्पतालमा उपचारकालागि आएका ९ जनालाइ पनि क्वारेन्टाइनमा राखिएको छ । भारतबाट आएका उनीहरु उपचारकालागि भन्दै जिल्ला अस्पतालमा आएका थिए ।रोग नफैलियोस भनेर सजगताका लागि क्वारेन्टाइमा राखिएको डाक्टर गौतमले बताए ।
शितगंगा नगरपालिकाले हाल बैदेशिक रोजगारबाट फर्किनु भएका ब्यक्तिहरुलाई अनिबार्य क्वारेन्टाइनमा बस्न आग्रह गरेको नगर प्रमुख सुर्य प्रसाद अधिकारीले बताए । कवारेन्टाइनमा बसे नबसेको अनुगमन गर्ने र नियम पालना नगरेको पाइएमा त्यस्ता ब्यक्तिलाई तत्काल नियन्त्रण गरी क्वारेन्टाइनमा राख्ने निर्णय भएको उनले बताए ।
अर्घाखाँचीको पाणिनी गाउँपालिकामा स्वदेश तथा विदेशबाट सरकारले लकडाउन गर्नु अघि करिब २५ सय मानिस प्रवेश गरेका छन् । पाणिनी गाउँपालिकाका ८ वटा वडाले निकालेको तथ्याङ्क अनुसार गाउँमा आउँनेको संख्या करिब २५ सय रहेको छ ।
जसमा भारतबाट ३५० बिदेशबाट २८ र बुटवल काठमाडौबाट २१ सय गरि करिब २५ सय नागरिक आएको पाणिनी गाउँपालिका अध्यक्ष अचुत गौतमले जानकारी दिए।
जिल्लाको मालारानी गाउँपालिका ४ खनमा मात्रै रोजगारीको शिलशिलामा भारतबाट ९० जना आएको खन स्वास्थ्य चौकीका इन्चार्ज भबिश्वर खनाले जानकारी दिए । जसमा ८४ जना पुरुष र ६ जना महिला रहेको वडा अध्यक्ष बिष्णु पोख्ररेलले बताए।
सन्धिखर्क नगरपालिका वडा नम्वर ६ नरपानीमा लकडाउन हुन अघि ३६ जना भारतबाट फर्किएका छन् । वडा कार्यलय नरपानीले संकलन गरेको तथ्यांक अनुसरा ३६ जना भारतबाट घरमा आएका रहेको वडा अध्यक्ष कृष्णबहादुर आचार्यले बताए। सबैलाई सुरक्षित अवस्थामा होम क्वारेन्टाइनमा बस्न आग्रह गरिएको वडा अध्यक्ष आचार्यले बताए ।
प्रतिक्रिया दिनुहोस !
