सीडीओ भन्छन्,‘पास मागेरै हैरान बनाए’
परासी : सरकारले लकडाउन गरेसँगै सवारीसाधन आवतजावत रोकिएपछि पश्चिम नवलपरासीमा सवारी पास माग्नेको संख्या दिनप्रतिदिन बढ्दै गएको छ । सवारीसाधन सञ्चालनको पास माग्न थालेपछि अहिले जिल्ला प्रशासनलाई हैरानी भएको छ ।
लकडाउनको चौथो दिनसम्म करिब ४ सय बढीले सवारी पास बनाइदिन भन्दै फोन गरेको प्रमुख जिल्ला अधिकारी बासुदेव दाहालले बताए । अत्यावश्यक काममा आवातजावत गर्ने कर्मचारी र संस्थाका व्यक्तिहरु बाहेक कसैलाई पनि जिल्लाबाट पास उपलब्ध नगराइएको उनले बताए । सबैभन्दा बढी जिल्लाका प्रतिष्ठित व्यक्तिहरूले नै पास मागरे हैरान बनाउने गरेको उनी बताउँछन् ।
‘जिल्लाका प्रतिष्ठित व्यक्तिले नै फोन गरेर सहयोग गर्ने प्रतिबद्धता जनाउँछन् । लगत्तै आफ्नो मान्छे बाहिरी जिल्लामा रहेकाले पास बनाइदिन पर्यो भन्छन् । सहयोगका लागि फोन गरेको हो कि पास बनाउन बुझ्नै गाह्रो भो’, प्रजिअ दाहालले भने । अधिकांश पास माग्नेमा बाहिर गएका परिवारका सदस्यलाई ल्याउनका लागि फोन गर्ने गरिएको छ ।
अत्यावश्यकका काममा आउजाउ गर्नेबाहेक कसैको आग्रहमा पास वितरण नगरिएको उनले दाबी गरे । शुक्रबार मध्यान्हसम्म ८० जनालाई पास वितरण गरिएको छ । जसमा अदालत र सरकारी वकिल कार्यालयका कर्मचारी, मेडिकल सञ्चालक, स्थानीय तहका जनप्रतिनिधि छन् । ‘केही काजक्रियाका लागि जानु पर्ने र डाइलोसिसलगायत जटिल प्रकारका बिरामीलाई पनि पास दिएका छौं । त्यसबाहेक कसैलाई दिइएको छैन ’, प्रजिअ दाहाललले भने । अत्यावश्यकबाहेक कसैलाई पनि पास नदिइने भएकाले कसैले पनि पासका लागि अनुरोध र दबाब नदिन प्रजिअ दाहालले आग्रह गरेका छन् ।
३२ जना क्वारेन्टाइनमा
पश्चिम नवलपरासीमा ३२ जनालाई क्वारेन्टाइनमा राखेर उपचार गरिएको छ । एकजनालाई आइसोलेसनमा पठाइएको छ । जिल्लामा तीन नगरपालिका र चार गाउँपालिका छन् । सबै स्थानीय तहले क्वारेन्टाइन निर्माण गरेका छन् । जिल्लामा १ सय ८७ क्वारेन्टाइन निर्माण गरिएको स्वास्थ्य कार्यालयका प्रमुख गौरब ढकालले बताए ।
सबैभन्दा बढी सुनवलमा १२ जनालाई क्वारेन्टाइनमा राखिएको छ । त्यसैगरी बर्दघाट नगरपालिकामा २ जना क्वारेन्टाइनमा छन् । प्रतापपुरमा ७, पाल्हीनन्दनमा ६ र सुस्ता गाउँपालिकामा ५ जनालाई क्वारेन्टाइनमा राखेर उपचार गरिएको स्वास्थ्य प्रमुख ढकालले बताए ।
क्वारेन्टाइनमा राखिएका अधिकांश भारत र तेस्रो मुलकबाट आएका नेपाली हुन् । केही स्थानीयलाई पनि लक्षण देखिएपछि क्वारेन्टाइनमा राखिएको स्वास्थ्य कार्यालयले जनाएको छ । क्वारेन्टाइनमा रहेका एकजनालाई थप उपचारका लागि प्रादेशिक अस्पताल बुटवलको आइसोलेसनमा पठाइएको छ । जिल्लामा ८ आइसोलेसन निर्माण गरिए पनि प्रयाप्त सामाग्री नहुँदा उपचारमा समस्या भएको छ ।