काठमाडौं : नेपालमा कोरोना भाइरस संक्रमितको संख्या ६ पुगेको छ। उनीहरुको विभिन्न अस्पतालमा उपचार भइरहेको छ। संक्रमितको स्वास्थ्य अवस्था सामान्य रहेको स्वास्थ्य तथा जनसंख्या मन्त्रालयले जनाएको छ। एकजना भने निको भएर घर फर्किसकेका छन्।
हालसम्म ४ वटा जिल्लामा कोरोना संक्रमण देखिएको छ। काठमाडौं, बागलुङ, धादिङ र कैलाली गरी ४ जिल्लामा संक्रमण देखिएको हो। स्वास्थ्य तथा जनसंख्या मन्त्रालयका प्रवक्ता विकास देवकोटाका अनुसार राष्ट्रिय प्रयोगशालामा शुक्रबारसम्म १२७७ जनाको कोरोना संक्रमण परीक्षण गरिएको छ।
सरकारले टेकुमा मात्र भइरहेको नमुना परीक्षणको दायर बढाएर सातै प्रदेशमा पुर्याएको छ। पोखरा, धरान, हेटौंडा, जनकपुर, सुर्खेत र धनगढीमा परीक्षण सुरु भइसकेको छ। बुटवलमा भने मेसिन जडानको काम भइरहेको छ।
शुक्रबार मात्रै धरानमा ३९,पोखरामा १९, हेटौडामा ५, जनकपुरमा ५ जना, सुर्खेतमा ७ र धनगढीमा ४ जनाको कोरोना आशंकामा नमूना परीक्षण गरिएको मन्त्रालयले जनाएको छ।
पहिलो संक्रमित
नेपालमा पहिलोपटक कोरोना भाइरस संक्रमण पुष्टि भएका युवा नेपालगन्जका हुन्। उनी निको भएर नियमित कामकाजमा फर्किएका छन्। उनी चीनबाट माघ ९ गते काठमाडौं हुँदै नेपालगन्ज गएका थिए। घर पुग्दा ज्वरो आएपछि उनी तत्काल नेपालगन्जबाट पुनः काठमाडौं फर्केर सरुवा रोग अस्पताल टेकु पुगेका थिए। उनले समान्य बिरामीसरह दुई घण्टा लाइन बसेर ल्याब परीक्षण गराएक थिए। उनी माघ २३ गते अस्पतालबाट डिस्चार्ज भएका हुन्।
दोस्रो संक्रमित
फ्रान्सबाट कतार हुँदै काठमाडौँ फर्किएकी १९ वर्षीया युवतीमा दोस्रो कोरोना भाइरस (कोभिड-१९) संक्रमित हुन्। स्वास्थ्य तथा जनस्वास्थ्य मन्त्रालयले उनमा कोरोना भाइरस रिपोर्ट नेगेटिभ भएको चैत्र १० गते सार्वजनिक गरेको थियो।
चैत ४ गते काठमाडौँ फर्किएपछि ती किशोरी होम क्वारेन्टिनमा बसिरहेकी थिइन्। उनको राष्ट्रिय जनस्वास्थ्य प्रयोगशाला, टेकुमा परीक्षणका क्रममा कोभिड १९ पोजिटिभ भेटिएको थियो। हाल उनलाई शुक्रराज सरुवा रोग अस्पतालमा आइसोलेसनमा राखिएको छ। उनको स्वास्थ्य अवस्था सामान्य रहेको स्वास्थ्य मन्त्रालयले जनाएको छ।
तेस्रो संक्रमित
कोरोना तेस्रो संक्रमित हुन् धादिङ ३२ वर्षीय पुरुष। उनी चैत ६ गते यूएईबाट एयर अरेबियाको फ्लाइट नम्बर जी ९५३७ बाट त्रिभुवन विमानस्थलमा उत्रिएका थिए। काठमाडौंको एक होटलमा बसेका उनको स्वास्थ्यमा समस्या आएपछि टेकुस्थित शुक्रराज ट्रपिकल तथा सरुवा रोग अस्पताल पुगेका थिए ।
त्यहाँ उनको स्वाब संकलन गरी राष्ट्रिय जनस्वास्थ्य प्रयोगशाला पठाइएको थियो। चैत्र १२ गते उनलाई कोरोना संक्रमण भएको पुष्टि भएको थियो। हाल उनको शुक्रराज ट्रपिकल तथा सरुवा रोग अस्पतालमा उपचार भइरहेको छ।उनको स्वास्थ्य अवस्था सामान्य रहेको अस्पतालले जनाएको छ।
चौथो संक्रमित
चौथो संक्रमित व्यक्ति हुन् धनगढी निवासी ३४ वर्षीय पुरुष। दुवईबाट आएका उनी चैत ११ गते सेती प्रादेशिक अस्पतालमा भर्ना भएका थिए। उनी २० मार्चमा भिस्टारा एअरबाट दिल्लीबाट नेपाल आइपुगेका थिए। दिल्लीमा दुवईबाट इमिरेट्सको उडानबाट आएका उनको स्वाथ्य तथा जनसंख्या मन्त्रालयले चैत्र १४ गते कोरोना भएको पुष्टि गरेको थियो। संक्रमित व्यक्ति हाल धनगढीको प्रादेशिक अस्पतालमा उपचार भइरहेको छ। उनको स्वास्थ्य अवस्था पनि सामान्य रहेको छ।
पाँचौं संक्रमित
पाँचौं कोरोना संक्रमित व्यक्ति हुन् बागलुङ निवासी १९ वर्षीया युवती। उनी बेल्जियमबाट कतार एअरवेजको उडान ६५२ बाट १७ मार्च अर्थात् चैत ४ गते नेपाल आएकी थिइन्। ती युवती नेपाल आएकै दिन यति एअरको जहाजबाट पोखरा पुगेकी थिइन् । उनी त्यहाँबाट स्कार्पियो चढेर बाग्लुङस्थित घर पुगेकी थिइन्।
उनको चैत्र ११ गतेमात्रै स्वाब संकलन भएको थियो । त्यसअघि ७ चैतमा अञ्चल अस्पतालमा गई स्वास्थ्य जाँच गराउँदा सामान्य ज्वरो र खोकी भन्दै चिकित्सकले घर पठाएका थिए ।उनमा १५ चैत शनिबार मात्रै कोरोना पुष्टि भएको हो। उनको बाग्लुङस्थित धौलागिरि अञ्चल अस्पताल उपचार भइरहेको छ।उनको स्वास्थ्य अवस्था पनि सामान्य रहेको सम्बन्धित अस्पतालले जनाएको छ।
छैटौं संक्रमित
छैटौं कोरोना भाइरस संक्रमित हुनेमा बागलुङ निवासी ६५ वर्षीया महिला हुन्। उनी चैत ४ गते कतारको दोहाबाट आएकी थिइन्। उनी क्यूआर ६५२ को फ्लाइटबाट दोहाबाट काठमाडौं आएकी हुन्। चैत्र २१ गते उनलाई कोरोना भाइरस संक्रमण भएको पुष्टि भएको हो।ती महिला पनि बेल्जियमबाट पाँचौ संक्रमित युवतीसँगै कतार एयरको उडान नम्बर क्युआर ६५२ बाट चैत ४ मा नेपाल आएकी थिइन्।उनको बाग्लुङस्थित धौलागिरि अञ्चल अस्पताल उपचार भइरहेको छ।
प्रतिक्रिया दिनुहोस !
