चरिकोट : लकडाउन लागू भएको १५ दिनपछि पहिलोपटक दोलखामा १५ महिने बच्चासहित २५ जनालाई क्वारेन्टाइनमा राखिएको छ । भारतबाट दोलखा भित्रिएका तीनसहित २५ जनालाई क्वारेन्टाइनमा राखिएको हो । जसमा १५ महिने बच्चादेखि ७२ वर्षीय जेष्ठ नागरिकसम्म रहेका छन् । कालिञ्चोक गाउँपालिकामा २३ जना र मेलुङ गाउँपालिकामा दुई जनालाई क्वारेन्टाइनमा राखिएको सम्वद्ध स्थानीय तहले जनाएका छन् ।
सोमबार काठमाडौंबाट घर फर्किएका कालिञ्चोक गाउँपालिकाका २३ जनालाई कालिञ्चोक गाउँपालिका-३ सिंगटीस्थित प्रतापस्मृति क्याम्पसमा स्थापना गरिएको क्वारेन्टाइनमा राखिएको कालिञ्चोक गाउँपालिकाका अध्यक्ष विनकुमार थामीले बताए ।
मंगलबार चार बालबालिकासहित २३ जनालाई सिंगटीस्थित प्रताप स्मृति कलेजमा गाउँपालिकाले बनाएको क्वारेन्टाइनमा खाने सुविधासहित राखिएको गाउँपालिका अध्यक्ष थामीले बताए । क्वारेन्टाइनमा राखिएका २३ जनामा कालिञ्चोक गाउँपालिका ४, लामिडाँडाका पाँच जना, वडा नम्बर ५ लापिलाङका छ जना, वडा नम्बर ६ लापिलाङका सात जना, वडा नम्बर ९ सुन्द्रावतीका तीन जना तथा दोलखा तामाकोशी गाउँपालिकाका एक जना र नुवाकोट जिल्लाका एक जना रहेको अध्यक्ष थामीले जानकारी दिए ।
त्यसैगरी दोलखाको मेलुङ गाउँपालिका-७ मा भारतबाट आएका दुईजनालाई स्थानीय सेतदेवी प्राविमा स्थापना गरिएको क्वारेन्टाइनमा राखिएको वडाध्यक्ष नवराज खड्काले जानकारी दिए । गाउँपालिकाले विदेशबाट आएकाहरुको घरमा रातो झण्डा गाडे पनि उनीहरु १४ दिन नपुग्दै खुलेआम बाहिर हिंडडुल गर्न लागेपछि सुरक्षित आवासमा राखिएको वडाध्यक्ष खड्काको भनाई छ ।
प्रतिक्रिया दिनुहोस !
