सभासद्ले आफ्नो निर्वाचन क्षेत्रमा बाडे ३४ लाखको स्वास्थ्य सामाग्री

परासी : प्रदेश ५ का सभासद् बैजनाथ जयसवाल (कलवार) ले आफ्नो निर्वाचन क्षेत्रका सबै घरधुरीलाई स्वास्थ्य सामाग्री वितरण गरेका छन् । पश्चिम नवलपरासी निर्वाचन क्षेत्र नं. २ (ख) बाट निर्वाचित सभासद् जयसवालले ३४ लाख बराबरको सामाग्री सर्वसाधारणलाई वितरण गर्न स्थानीय तहलाई हस्तान्तरण गरेका हुन् । 

१८ वडा रहेको रामग्राम नगरपालिकाका १३ वटा वडा र पाल्हीनन्दन गाउँपालिकाका सबै (६) वडाहरु उनको निर्वाचन क्षेत्रमा पर्दछन् । सभासद जयसवालले त्यहाँ रहेका कुल १७ हजार घरधुरीलाई जनही २ थान मास्क, १ सय ५० एमएलको सेनिटाइजर र एक बट्टा साबुन वितरण गरेका हुन् । 
वितरण गरिएको सुरक्षित सामाग्रीको मूल्य एक घरधुरीलाई जनही २ सयका दरले रहेको छ । ‘विपन्नका लागि स्थानीय सरकारले राहत उपलब्ध गराउँदै आएका छन् । संघसंस्थाले पनि एकद्वार प्रणालीमार्फत राहत दिएका छन् । गाउँघरमा कोरोनाबाट सुरक्षित रहन सामान्य स्वास्थ्य सामाग्री अभाव देखेकाले उक्त सामाग्री उपलब्ध गराएको हुँ,' सभासद जयसवालले भने ।  

सभासदबाट प्राप्त सुरक्षित सामाग्री वडामा गठन भएका विपद् व्यवस्थापन समितिमार्फत जनताको घर-घरमा पुर्‍याइने पाल्हीनन्दन गाउँपालिकाकी उपाध्यक्ष पावित्रीकुमारी कोहारले बताइन् ।