चितवन : पूर्वी चितवनको रत्ननगरमा गरिएको र्याापिड डाइग्नोस्टिक टेस्ट (आरडिटी) परीक्षणको क्रममा एक जनाको पोजिटिभ रिपोर्ट आएको छ । गुञ्जमान अस्पतालमा गरिएको र्यापिड टेस्टमा एक जनाको रिपोर्ट पोजिटिभ देखिएको हो ।
रत्ननगर नगरपालिकाले विदेशबाट फर्किएकाको सुचि तयार गरेर अस्पताललाई दिएको थियो । अस्पतालले र्याापिड डाइग्नोस्टिक टेस्ट गर्न सूचना जारी गरेपछि उनी आफैँ अस्पताल गएका थिए । बुधवार गरिएको ३९ जनाको परीक्षणमा उनीमा मात्रै पोजिटिभ देखिएको गुञ्जमान सिंह अस्पतालका प्रशासक मोहन खड्काले बताए । ‘उहाँमा लक्षण केही देखिएको छैन स्वास्थ्य अवस्था सामान्य छ ’, खड्काले भने, ‘पुन स्वाब परीक्षणका लागि भरतपुर पठाइएको छ । यो अवधिमा उहाँलाई छुट्टै अइसोलेसनमा राखिएको छ । ’
स्वाबको थप परीक्षणको लागि भरतपुर कोभिड १९ परीक्षण प्रयोगशालामा स्वाबको नमूना ल्याइएको छ । प्रयोगशालाको परीक्षणबाट यकिन रिपोर्टपछि मात्रै कोरोना भाइरस भए नभएको यकिन हुन्छ ।
कोभिड १९ को र्याापिड डाइग्नोस्टिक टेस्ट परीक्षणबाट पूर्वी चितवनको रत्ननगरका ४७ वर्षीय पुरुषमा पोजिटिभ देखिएको हो । प्रयोगशालामा उनको स्वाब परीक्षण थालिएको छ । प्रयोगशालाका वरिष्ठ मेडिकल ल्याब टेक्नोलोजिष्ट दिपक सुवेदीले पिसिआर परीक्षणको रिपोर्टबाट मात्रै थाहा हुने बताए । ‘एक पटक पोजिटिभ आए फेरि हामी दोहोर्याएर गर्छौं’, सुवेदीले भने, ‘र्यापिड टेस्टबाट मात्रै यकिन भने हुँदैन।’
उनलाई गुञ्जमान सिंह अस्पतालको आइसोलेसन वार्डमा राखिएको छ । उनी फागुन ३० गते दक्षिण कोरियाबाट नेपाल आएका हुन् । नेपाल फर्किने बेला परीक्षण गर्दा भने नेगेटिभ रिपोर्ट आएको उनले अस्पताललाई बताएका थिए ।
गुञ्जमान सिंह अस्पतालले विदेशबाट फर्किएका वडा नम्बर दशदेखि १६ सम्मका ६४ जनाको र्याापिड डाइग्नोस्टिक टेस्ट गरेको थियो । तीन जनाको रिपोर्ट आउन बाँकी रहेको छ । बाँकीको रिपोर्ट नेगेटिभ देखिएको छ ।
प्रतिक्रिया दिनुहोस !
