डोल्पा : डोल्पामा कोरोना भाइरस (कोभिड-१९) द्रुत परीक्षण गर्ने किट र उपकरण पुगेको छ । कोरोनाको परीक्षण स्थानीय तहबाट सुरु गरिने भएको हो । कोरोना आरडिटी परीक्षण किट १४० थान मलेरीयाको किट १२५ थान र रगत निकाल्न प्रयोग गरिने सेट जिल्लामा पुगेको स्वास्थ्य सेवा प्रमुख डाक्टर जिजन रावलले जानकारी दिए ।
डा.रावलले स्वास्थ्य विभागले पहिला विदेशबाट आएकाको परीक्षण गर्न निर्देशन दिएको बताए।तर, कुन स्थानीय तहमा कति छ भन्ने विवरण जिल्लामा नआएकाले परीक्षण सुरु भएको छैन।
जिल्लाको मुड्केचुला गाउँपालिका र जगदुल्ला गाउँपालिकामा केही तथ्याङ्क भएकाले डाक्टर मछिन्द्र बडुवालको नेतृत्वमा ४ जनाको टोली सम्बन्धीत स्थानीय तहमा गएर कोरानाको द्रुत परीक्षण गरिने स्वास्थ्य सेवा प्रमुख डाक्टर रावलले जानकारी दिए ।
विदेशबाट आएकाको कोरोना परीक्षण गरिने र जिल्लामा क्वारेन्टिनमा रहेका र केही लक्षण देखा परेकालाई पहिला परीक्षण गरिने प्रमुख जिल्ला अधिकारी सुरेस सुनारले जानकारी दिए ।
जिल्ला अस्पतालमा पनि कोरोनाका द्रुत परीक्षण हुने तर सकेसम्म स्थानीय तहमा डाक्टरको टिम नै गएर द्रुत परीक्षण गर्ने उनले बताए । जिल्लामा ३ हजार भन्दा धेरै मानिस भित्रिएको भएपनि कुन स्थानीय तहमा कतिजना आए भन्ने तथ्याङ्क जिल्लामा छैन । भारतबाट आएका धेरैजसो माथिल्लो डोल्पामा गएका छन् तर यतिबेला माथिल्लो डोल्पामा परीक्षण गर्न भने निकै संभावना कम छ ।
प्रतिक्रिया दिनुहोस !
