लकडाउनमा मुस्ताङ प्रवेश गर्ने ४ युवालाई क्वारेन्टाइनमा पठाइयो

जोमसोम : पोखरादेखि म्याग्दीहुँदै आइतबार बिहान ट्रक र पैदलयात्रा गरी मुस्ताङ प्रवेश गर्न खोज्ने ४ जना युवालाई घांसा प्रहरी चौकी तथा स्थानीय जनप्रतिनिधिले क्वारेन्टाइनमा राखेको छ । म्याग्दी र मुस्ताङको मुख्य प्रवेशद्धार मानिएको थासाङ गाउँपालिका-४ को जनता आधारभूत विद्यालयमा पालिकाले व्यवस्था गरेको क्वारेन्टाइनमा राखिएको प्रहरी चौकी घासाका इन्चार्ज नीमप्रसाद तिमिल्सिनाले जानकारी दिए ।

क्वारेन्टाइनमा राखिएका ४ युवा मध्ये ३ जना पोखरादेखि पैदल आएको र १ जना मालवाहक ट्रकमा चढेर आएको प्रहरी इन्चार्ज तिमिल्सिनाले अन्नपूर्ण अनलाइनलाई जानकारी दिए ।

सरकारले लगाएको लकडाउन समयमा पोखरादेखि मुस्ताङ प्रवेश गर्न खोज्ने युवामा मुस्ताङको घासा ,कोवाङ,स्याङ र जोमसोमका हुन् । उनीहरुलाई कोरोना रोकथाम तथा नियन्त्रणका लागि भन्दै सम्झाइ बुझाइ क्वारेन्टाइनमा राखिएको थासाङ-४ का वडाध्यक्ष विशाल शेरचनले जानकारी दिए ।

उनले सरकारले तोकेको मापदण्ड अनुसार १४ दिन क्वारेन्टाईनमा राखि स्वास्थ्य परीक्षण गराई घर पठाइने बताए । यसअघि उपल्लो मुस्ताङका ४ युवा र ट्रकका सहचालक गरी ७ जनालाई घासाकै क्वारेन्टाईनमा राखिएको थियो । घरपझोङ-३ को क्वारैनटाइनमा पनि २ जना छन् ।

योसँगै मुस्ताङ प्रवेश गर्न खोजेका र क्वारेन्टाइनमा बस्नेको संख्या १३ जना पुगेको मुस्ताङका प्रमुख जिल्ला अधिकारी वेदप्रकास अर्यालले जानकारी दिए । क्वारेन्टाइनमा बस्ने १३ मध्ये ७ जना घर फर्किएका छन् । 

जिल्ला कमाण्ड पोष्ट मुस्ताङका अध्यक्ष एवं प्रमुख जिल्ला अधिकारी वेदप्रकाश अर्यालले जिल्लाका ५ स्थान तहका १६ स्थानमा ९६ बेडको क्वारेन्टाईन स्थापना भएको बताए । उनले जिल्ला फर्किने संख्या बढी भएकाले क्वारेन्टाइलाई तेब्बर बनाउन स्थानीय तहलाई निर्देशन दिएको बताए ।