बैतडी : बैतडीमा भारतबाट फर्केका सबैको र्यापिडडाइग्नोस्टि टेस्ट (आरडीटी) गरिने भएको छ । चैतको महिना भारतबाट फर्केका सबैको आरडीटी गरिने भएको हो ।
चैत महिनामात्रै भारतबाट ४ हजार ८२२ जना भित्रिएका भएपनि अहिलेसम्म ७ सयको मात्रै आरडीटी र स्वाब टेस्ट भएकाले बाँकीको पनि र्यापिड टेस्ट गरिने निर्णय भएको प्रमुख जिल्ला अधिकारी आनन्द पौडेलले जानकारी दिए । चैत १० गते अघि बैतडी भित्रिएकाहरुको जाँच गर्न बाँकी रहेकाले उनीहरुको र्यापिडटेस्ट गरिने भएको हो । उनले भने, ‘कोरोना भाइरसको जोखिम न्यूनीकरणका लागि हामीले भारतबाट फर्केका सबैको र्यापिड टेस्ट गर्ने निर्णय गरेका छौं ।’
जिल्लामा अहिले १ हजार ६ सय र्यापिड कीट मात्रै भएकाले थप कीट प्रदेश सरकारबाट मगाउने पहल भइरहेको स्वास्थ्य कार्यालयका प्रमुख योगेशप्रसाद भट्टले बताए । उनले भने, ‘पालिकामा गएको चैत महिना भित्रिएकाहरुको तथ्यांक अनुसार ४ हजार बढी नागरिक भित्रिएका छन् । उनीहरु सबैको र्यापिड टेस्ट गर्नका लागि थप कीट मगाउने पहल भईरहेको छ ।’
चैत महिनाभित्र दशरथचन्द नगरपालिकामा ५३१ जना, पुर्चौंडीमा ३४३ जना, मेलौलीमा ४४९ जना, पाटनमा ४८२ जना र सुर्नयामा ४०५ जना भित्रिएका छन् । यस्तै डिलाशैनीमा २६५ जना, दोगडाकेदारमा ४०१ जना, पञ्चेश्वरमा ८९५ जना, सिगासमा १३९ जना र शिवनाथ ९१२ जना भित्रिएका बताइएको छ ।
यस्तै बैठकले पालिकास्तरीय क्वारेन्टाइनमा निर्माणका कामलाई पनि तीव्रता दिने निर्णय गरेको छ । यस्तै राष्ट्रिय गौरवका आयोजना र प्रदेश गौरवका आयोजना सञ्चालन गर्न दिने र त्यसको अनुगमन समेत गर्ने निर्णय भएको प्रमुख जिल्ला अधिकारी पौडेलले जानकारी दिए ।
यस्तै राहत वितरण प्रक्रियालाई प्रभावकारी बनाउन एकद्वार प्रणाली मार्फत मात्रै गर्न पाउने कुरालाई कडाईका साथ लागु गर्ने निर्णय समेत भएको छ ।
यसैगरी विवाह ब्रतबन्ध जस्ता शुभकार्यमा ५ जनामात्रै सहभागी भएर गर्न पाउने निर्णय समेत कोरोना रोकथाम तथा नियन्त्रण जिल्ला स्तरीय संयन्त्रको बैठकले गरेको प्रमुख जिल्ला अधिकारी पौडेलले जानकारी दिए ।
प्रतिक्रिया दिनुहोस !
