मुगु : सरकारले कोरोना भाइरस नियन्त्रण,रोकथाम र उपचारमा सहज होस् भनेर गरेको लकडाउनका कारण जिल्लाबाहिर अलपत्र परेका आफ्ना नगरबासीलाई उद्दार गर्न लागिएको छ । मुगु जिल्लाको चार स्थानीयतहमध्ये छायाँनाथ रारा नगरपालिकाले अध्ययन, नाकरी, औषधी उपचार तथा अन्य कामको शिलशिलामा लक डाउनका कारण घर फर्कन नपाएका नगरबासीलाई उद्घार गर्न लागेको हो ।
जिल्लाबाहिर सुर्खेत, नेपालगंग र काठमाडौंमा अध्यन, नोकरी, औषधी उपचार लगायत अन्य कामले गएका आफना नागरिक लकडाउनले गर्दा अलपत्र पर्न गइ खाना र बस्नसमेत समस्या पर्न थालेको खबर आउने गरेकाले संघीय सरकार र प्रदेश सरकारको समन्वयमा आफ्ना नगरबासीलाई गृह जिल्लासम्म सडक यातायातमार्फत उद्दार गर्न लागेको नगरप्रमुख हरिजंग शाहीले बताए ।
कर्णाली प्रदेश सरकार आन्तरिक मामिला तथा कानुन मन्त्रालयबाट नगरपालिकालाई पास प्राप्त भैसकेकाले सम्भवत बुधबारसम्म नेपालगंज र सुर्खेतबाट अलपत्र परेका नगरबासीलाई उद्दार गरिसक्ने र काठमाडौँ, बेखर्ची र बेसहारा भएर अलपत्र परेकाहरुको लगत, सम्पर्क नम्बर संकलन गर्ने काम भैरहेको छ । एकिन संख्या आएपछि बसको व्यवस्था गरि उद्दार गरिने नगरपालिकाले जानकारी दिएको छ । काठमाडौँदेखि मुगुसम्म बस संचालन अनुमतिका लागि प्रधानमन्त्रीको कार्यालय, गृह मन्त्रालयसँग समन्वय भइरहेको समेत छाँयानाथ नगरपालिकाले बताएको हो ।
यसरी उद्दार गरिने नगरबासीलाई कम्तिमा १४ दिन नगरपालिकाले निमार्ण गरेको क्वारेन्टाइन वा आफ्नै होम क्वारेन्टाइनमा बस्ने सर्तमा मात्र उद्घार गरिने पनि नगरपालिकाले बताएको छ ।
लकडाउन लम्बिएपछि बेखर्ची भएका मुगालीहरु काठमाडौँ, नेपालगंज र सुर्खेतबाट पैदल हिँडेर आएका छन् । घर पुग्न हिँडेकाहरु सुर्खेतको छिन्चु, बबई, दैलेखको डुन्गेश्वर, राकम, छेडागाड, साथै कालिकोटको नाग्म र मात्म अलपत्र अवस्थामा रहेका छन् ।
प्रतिक्रिया दिनुहोस !
