बैतडी : महाकाली नदीमा ट्युबमार्फत नेपालीहरु स्वदेश फर्कन क्रम नरोकिएपछि बैतडीका विभिन्न घाटमा सशस्त्र प्रहरी परिचालन गरिएको छ । कोरोनाको संक्रमण रोकथाम तथा नियन्त्रणका लागि सीमा नाका सशस्त्र प्रहरी खटाइएका हुन् । तर सीमामा रहेका सशस्त्र प्रहरीहरुले विभिन्न समस्या झेल्दै आएका छन् ।
जिल्लाका ६ ठाउँमा सशस्त्र प्रहरी परिचालन गरिएको सशस्त्र प्रहरी बल नम्बर ५१ गुल्मका सशस्त्र प्रहरी नायव उपरीक्षक अमित सिंहले बताए । उनले भने, 'हामीले सीमामा सशस्त्र प्रहरी खटाएको २० दिन भन्दा बढी भइसकेको छ । त्रिपालको भरमा सीमामा सुरक्षा दिइरहेका छौं ।'
महाकाली नदी किनारैकिनार सीमा भएकाले नदी किनारमै खटिनुपर्ने बाध्यता सशस्त्र प्रहरीलाई छ । सीमामा बिओपी नहुँदा अस्थायी क्याम्प बनाएर प्रहरी परिचालन गर्नुपरेको सशस्त्र प्रहरी नायब उपरीक्षक सिंहले बताए । उनले भने, 'सीमामा सशस्त्र प्रहरी खटाएपछि ट्युबबाट अवैध आवागमन रोकिए पनि प्रहरीलाई भने बस्न, खानकै समस्या छ । नदी किनारमा बालुवामै टेन्ट राखेर बस्नुपर्ने बाध्यता छ ।'
शिवनाथ गाउँपालिकाको कुस्मौद घाट, पञ्चेश्वर गाउँपालिकाको रोलघाट, पञ्चेश्वरकै विनायक घाट र पञ्चेश्वरको रोडीदेवलमा सशस्त्र प्रहरी खटिएका छन् । यस्तै दशरथचन्द नगरपालिकाको बारकोट र सेरामा पनि सशस्त्र प्रहरी खटिएको जनाइएको छ ।
गर्मीको समय बढ्दै जाँदा सीमामा खटिएका सशस्त्र प्रहरीलाई नदी किनारमा ड्युटी गर्न निकै मुस्कील भएको छ । जिल्लामा दुई ठाउँमा बिओपी स्थापना गर्ने भनिएपनि अहिलेसम्म बिओपी स्थापना हुन सकेको छैन् । पञ्चेश्वर र झुलाघाटमा बिओपी स्थापनाको तयारी छ । तर पनि भौतिक पूर्वाधारलगायतका कारण बिओपी स्थापना हुन नसकेको सशस्त्र प्रहरी नायव उपरीक्षक सिंहले बताए ।
सीमा क्षेत्रमा अहिले ८० जना सशस्त्र प्रहरी खटिएका छन् । उनीहरुले चौबिसै घण्टा सीमामा पहरा दिइरहेका छन् । अवैध नाकाबाट ट्युबबाट महाकाली तरेर भारतबाट नेपालीहरु फर्कन थालेपछि सीमामा कडाइ गरिएको हो ।
सीमामा खटिएका प्रहरीलाई स्थानीय तहहरुले केही सहयोग गरेको भएपनि पार्याप्त भने हुन सकेको छैन् । 'हामीले स्थानीय सरकारबाट आर्थिक सहयोग लिन मिल्दैन् । खटिएका ठाउँमा भवन भए स्थानीय सरकारले बसोबासको केही प्रबन्ध मिलाएको छ,' सशस्त्र प्रहरी नायव उपरीक्षक सिंहले भने।
प्रतिक्रिया दिनुहोस !
