जोमसोम : कोरोना भाइरस (कोभिड–१९) कारण लामो समयदेखि पोखरा र काठमाडौं लगायतका स्थानमा अलपत्र परेका मुस्ताङीलाई स्थानीय तहहरूले धमाधम जिल्ला फर्काउन थालेका छन्। अलपत्र परेकाहरूलाई रातारात बसमा चढाएर ३ जिल्ला कटाउँदै गाउँ पूर्याउन थालिएको हो ।
जिल्लाका संघ तथा प्रदेश सांसद ,स्थानीय तह, प्रशासन र सुरक्षा निकायको समन्वयमा मुस्ताङीलाई शनिबारदेखि गाउँ लैजान थालिएको हो । म्याग्दी र मुस्ताङको सीमानामा रहेको घासा प्रहरी चेक पोष्टले शनिबारदेखि मुस्ताङीहरू जिल्ला फर्किन थालेको जनाएको छ । घासा प्रहरी चेक पोष्टका इञ्चार्ज नीमप्रसाद तिमिल्सिनाले आइतबार बिहानसम्म १२ वटा बस र ३ वटा जीप गरी १५ वटा सवारी इन्ट्री भएको बताए । उक्त बसहरूमा ४ सय ४१ जना मुस्ताङी छन् । जिल्ला भित्रिएका सबैलाई रातको छेको पारी बसले गाउँ पुर्याएको हो ।
विश्वकै महामारीको रुपमा फैलिएको नोवल कोरोना भाइरसको उच्चजोखिमको उचित सावधानी अपनाउँदै मुस्ताङीलाई रातारात कतै नझारी सिधै गाउँ पुर्याउन थालिएको जनाइएको छ । ‘अन द रुढ, नो स्टप, गो टु होम ’ को नीति अनुरुप जिल्लाका स्थानीय तहले गाउँबासीलाई घर पुर्याउन थालेका हुन् ।
काठमाडौंमा अलपत्र १ सय ४० जना मुस्ताङी यात्रुलाई शनिबार मुस्ताङका संघीय सांसद प्रेमप्रसाद तुलाचनले ४ वटा बसमा गाउँ पठाएको जिल्ला युवा समिति मुस्ताङका अध्यक्ष सम्राट गौचनले जानकारी दिए । हिउँदयामको जाडो छल्न अध्ययन , बैकल्पिक घुम्ती व्यापार र रोजगारीमा बेशी झरेकाहरूको उद्दार कार्य भइरहेको गण्डकी प्रदेशका सांसद ईन्द्रधारा बिष्टले जानकारी दिए । उनका अनुसार अलपत्र परेका मुस्ताङीको संख्या एक हजारभन्दा बढी छ । लोमान्थाङ गाउँपालिकाबाट जिल्लाबासीलाई गाउँ फर्काउने काम भइरहेको बिष्टले बताए । अहिलेसम्म पोखराबाट ८ वटा बसमा ३ सय १ जना गाउँ पठाइएको जानकारी दिए । ५ वटै स्थानीय तहका अलपत्र मुस्ताङीलाई गाउँ पठाउन अझै केही दिन लाग्नसक्ने उनले बताए ।
सरकारी क्वारेन्टाइन खाली
पोखरामा अलपत्र परेका लोमान्थाङ–५ का ८४ जना स्थानीयलाई पालिकाले खडा गरेको क्वारेन्टाइनमा नराखी सिधै शनिबार घरघरमा पठाइएको छ । उनीहरूलाई म्याग्दी र मुस्ताङको सीमानामा स्वास्थ्य परीक्षण नगराइ गाउँमा सामान्य स्वास्थ्य परीक्षण गराइएको छ । गण्डकी प्रदेशमा कोरोना संक्रमण नदेखिएको र लामो समयदेखि अलपत्र परेको स्थानमा सुरक्षित होम क्वारेन्टाइनमा बसेको उल्लेख गर्दै स्थानीय तहले क्वारेन्टाइनमा नराखी पठाएको हो । जिल्ला भित्रिनेको संख्या अत्यधिक भएको र क्वारेन्टाइनको क्षमता कम भएकाले जिल्ला फर्किनेलाई होम क्वारेन्टाइनमा बस्न लगाइएको हो ।
स्थानीय तह, प्रशासन र सुरक्षा निकायबीच जिल्ला फर्किनेलाई गाउँ गाउँ बन्दाबन्दी गराएर होम क्वारेन्टाइनमा राख्ने सहमति भएको हो । होम क्वारेन्टाइनमा बस्नेलाई सरकारी मापदण्ड मिचेर स्थानीय तहहरूले ७ दिन मात्र घरभित्रै बस्न आग्रह गरेको छ । होम क्वारेन्टाइनमा राख्ने भएपछि मुस्ताङका १६ ठाउँका सरकारी क्वारेन्टाइन रित्तै हुने भएको छ ।
प्रतिक्रिया दिनुहोस !
