बैतडी : बैतडीको शिवनाथ गाउँपालिका ४ महरगाउँकी १९ वर्षीय किशोरी गीता महर मृत अवस्थामा फेला परेपछि प्रहरीले दुईजनालाई नियन्त्रणमा लिएको छ । गीताका आफन्तले दिएको उजुरीको आधारमा शिवनाथ गाउँपालिका २ का २२ वर्षीय अमरसिंह साउँद र १९ वर्षीय सरस्वती साउँदलाई नियन्त्रणमा लिइएको जिल्ला प्रहरी कार्यालय बैतडीका प्रहरी प्रवक्ता किसन चन्दले जानकारी दिए ।
गीताको शव सोमबार शिवनाथ गाउँपालिका २ पोखरकोटको दोगडाखोलाको किनारमा नग्न अवस्थामा भेटिएको थियो । पक्राउ परेका अमरसिंह साउँद महरका प्रेमी रहेको र सरस्वती अमरकी बहिनी रहेको प्रहरीले जनाएको छ । महरलाई उनका प्रेमी र बहिनीले बैशाख १३ गते साँझ विवाह गर्छु भनेर भगाएर लगेको मृतकका परिवारले आरोप लगाएका छन् ।
गीताका आफन्तले कीटानी जाहेरी दिएपछि दुवैजनालाई नियन्त्रणमा लिएको हो।घटनाबारे अनुसन्धान भइरहेको जिल्ला प्रहरी कार्यालयका प्रमुख प्रहरी नायव उपरीक्षक डिल्लीनारायण पाण्डेयले जानकारी दिए ।
पक्राउ परेका साउँदले गीतालाई आफूहरुले भगाएको र एक्कासी खोलामा पुग्दा बाढीले बगाएका बयान दिएका छन् । घटनाको अनुसनधानका लागि प्रहरी निरीक्षक गौरीप्रसाद जैशीको नेतृत्वमा प्रहरी टोली परिचालन गरिएको प्रहरी नायव उपरीक्षक पाण्डेयले बताए । मृत फेला परेकी गीताको शव पोष्टमार्टमपछि आफन्तलाई जिम्मा लगाएको छ । पोष्टमार्टमको रिपोट भने आउन बाँकी छ ।
प्रतिक्रिया दिनुहोस !
