कोरोना आशंकामा मुस्ताङकी एक महिलाको स्वाब नमूना पोखरा पठाइयो

जोमसोम : हिमाली जिल्ला मुस्ताङको घरपझोङ गाउँपालिका अन्र्तगत घरमै होम क्वारेन्टाइनमा बस्दै आएकी एक महिलाको सम्भावित कोरोना परीक्षण गर्न नमूना स्वाब बुधबार परीक्षणका लागि पोखरा पठाइएको छ ।

सम्भावित कोरोना आशंका गरिएकी ती महिलाको पीसीआर परीक्षण गर्न नमूना थ्रोड स्वाब संकलन गरी प्रादेशिक जनस्वाथ्य प्रयोगशाला पोखरातर्फ पठाइएको अस्पतालका मेडिकल सुपरिटेन्डन डा. शिव भण्डारीले जानकारी दिए । महिलाको स्वाब जोमसोमबाट जीपमार्फत पोखरा पठाइएको मेसु भण्डारीले बताए ।

ती महिला काठमाडौंबाट पोखराहुँदै बसमा चढेर मंगलबार मुस्ताङ आइपुगेकी थिक्षन् ।उनलाई जोमसोम अस्पतालको फिगर क्लीनिकमा राखेर परीक्षण गर्दा उच्च जरो देखिएको अस्पतालले जनाएको छ । हाल सम्भावित कोरोना भनिएकी महिलालाई जोमसोम अस्पतालको आइसोलेसन कक्षमा भर्ना गराई उपचार सुरु गरिएको अस्पतालका मेसु शिव भण्डारीले बताए।

ती महिलाको बुधबार बिहान द्रुत परीक्षण (र्‍यापिड डाइगोनोष्टिक टेष्ट ) परीक्षण गरिए पनि अस्पतालले र्‍यापिड टेष्टको नतिजा तत्कालै सार्वजनिक गर्न नमिल्ने जनाएको छ । स्वाब पोखरा पठाइएको र त्यहाँबाट पीसीआर रिपोर्टको नतिजा आइसकेपछि मात्र कोरोना भए नभएको पुष्टि हुने अस्पताल श्रोतले जनाएको छ।

स्थानीय तहको पहलमा पोखरा र काठमाडौंलगायतका स्थानमा अलपत्र रहेका करिब १२ सय मुस्ताङीलाई उद्दार गरी जिल्ला भित्र्याएको थियो । स्थानीय तहले जिल्ला भित्रिएका सबैलाई सरकारी क्वारेन्टाइनमा नराखी होम क्वारेन्टाइन,समाजघर र विद्यालयमा राखेको छ । स्थानीय तहले जिल्ला भित्रिएका सबैलाई सरकारले तोकेको १४ दिने क्वारेन्टाइन मापदण्ड घटाएर ७ दिन मात्र होम क्वारेन्टाइनमा बस्न लगाएको थियो ।