जाजरकोट : भेरी नगरपालिका–३, स्यालामा दानीलाल पुनले सञ्चालन गरेको 'पुन कुखुरा फार्म'बाट दैनिक ७ सय अण्डा उत्पादन हुन्छ । लकडाउनका कारण अण्डा बिक्री नहुँदा करिव १५ लाख रुपैयाँ घाटा बेहोर्नु परेको उनले गुनासो गरे । ‘फार्ममा अण्डाको थुप्रो लागेको छ,’ उनले भने, ‘कुखुरालाई दाना खुवाउन मात्र दैनिक ७ हजारका दरले खर्च हुन्छ तर अण्डा बिक्री हुँदैन ।’
उनको फार्ममा करिब १५ हजारभन्दा बढी अण्डा थन्किएका छन् । प्रतिअण्डा १० रुपैयाँमा दिँदा पनि बिक्री नभएको उनले सुनाए । उनले दाना प्रतिकिलो ७० रुपैयाँमा खरिद गरी एक हजार कुखुरा पालिरहेका छन् ।
आठ महिनाअघि व्यवसाय सुरु गरेका पुनले नाफा लिने बेला लकडाउनले समस्या पारेको बताए । ‘बजार र होटल ठप्प भएपछि अण्डा बिक्री हुन छाडे,’ उनले भने, ‘लकडाउन लम्बिंदै गएपछि व्यवसाय नै संकटमा पर्न थालेको छ ।’ उनका अनुसार लकडाउनअघि दैनिक करिब उत्पादन भएका सात सय अण्डा बिक्री हुन्थ्यो । तर अहिले सय अण्डा पनि बिक्री हुँदैन । लकडाउनकै कारण दानाको समेत अभाव हुन थालेको छ । दाना अभावमा दुई सय कुखुरा मरेको उनी बताउँछन् ।
त्यस्तै भेरी नगरपालिका ४ फुलबारीमा कुखुरा ब्यवसाय संचालन गर्दै आएका चन्द्रबहादुर पुनको समस्या पनि उस्तै छ । लकडाउनका कारण अण्डा बिक्री नहुँदा उनी चिन्तामा परेका छन् । उनको कुखुरा फर्ममा दैनिक साढे चार सय अण्डा उत्पादन हुन्छ । उनका पाँच सय कुखुरा छन् । सदरमुकामका घरघरमै गएर अण्डा पुर्याउने गरेको छु तर पनि सबै बिक्री हुँदैनन् । पहिलेका ग्राहक गाँउतिर लागेका छन् । होटल ब्यवसाय, विद्यालय कलेज बन्द छन् । ग्राहक नभएपछि अण्डा बिक्रीमा समस्या देखिएको छ । एक वर्षदेखि ब्यवसाय गर्दै आएका उनी फाइदा लिने बेला भएको लकडाउनले सबै लगानी डुब्न थालेको गुनासो गर्छन् । ‘दाना पनि पाइँदैन । पाइए पनि बढी मूल्य तिरेर किन्नु पर्छ । कुखुरा जोगाउनै मुस्किल छ’, उनले भने, ‘लामो लकडाउनले कुखुरापालन ब्यवसाय चौपट हुने भो ।’
उनीहरु जस्तै लामो लकडाउनका कारण अण्डा बिक्री नहुँदा जाजरकोटका कुखुरापालक किसान मर्कामा परेका छन् । जिल्लामा करिव ५० ब्यवसायीले कुखुरापालन गर्ने गरेका छन् । उनीहरू सबैका कुखुरा र अण्डा बिक्री नभएपछि समस्यामा परेका छन् । साहु ऋण गरेर ब्यवसाय सुरु गरेका लगानी डुब्ने चिन्ताले हैरान भएका छन् । लकडाउनका कारण दानासमेत नपाइने र पाएइए पनि महंगोमा किन्नु पर्दा व्यवसाय नै संकटमा परेको किसानको भनाइ छ।
प्रतिक्रिया दिनुहोस !
