परासी : पश्चिम नवलपरासीमा पीसीआर विधिबाट कोरोना परीक्षण सुरु गरिएको छ । जिल्लाका सातवटै स्थानीय तहबाट बुधबारदेखि परीक्षण सुरु गरिएको स्वास्थ्य कार्यालयका प्रमुख गौरव ढकालले जानकारी दिए ।
कोराना आशंका गरिएकाको स्वाब संकलन गर्न प्रदेश ५ सरकारले २ सय थान भिटिएम पठाएको छ । जिल्लाका १३ स्थानमा ४ आइसोलेसन र ३ सय १६ क्वारेन्टाइन छ । पहिलो चरणमा संस्थागत क्वारेन्टाइनमा बसेर घर गइसकेका र हाल बसिरहेकाको स्वाब संकलन गरी परीक्षणका लागि पठाइने छ । हरेक स्थानीय तहमा २५ देखि ५० जनासम्मको स्वाब संकलन गरिने छ ।
'संस्थागत क्वारेन्टाइनमा बसेर गएका १ सय ८९ जनाको आरटीडी परीक्षण भइसकेको छ । उनीहरुको पनि स्वाब संकलन हुन्छ । त्यसैगरी हाल क्वारेन्टाइनमा रहेका १ सय जनाको समेत स्वाब संकलन गरेर पठाइने छ,' स्वास्थ्य प्रमुख ढकालले भने ।
क्वारेन्टाइनमा बस्ने सबै भारतलगायत तेस्रो मुलकबाट आएका हुन् । जिल्लामा होम क्वारेन्टाइनमा बस्नेहरु करिब ७ सयको हाराहारीमा रहेको ढकालले जानकारी दिए ।'भिटिएम कम भएर पहिलो चरणमा क्वारेन्टाइनमा बसेकाको मात्र गर्न लागिएको हो । दोस्रो चरणमा भिटिएम आएपछि होम क्वारेन्टाइनमा बसेको पनि परीक्षण हुने ढकालले भने।
भिटिएमका लागि प्रदेश सरकारसँग माग गरिरहेको उनले बताए । ६ जना दक्ष स्वास्थ्यकर्मीले स्वाब संकलन गरिरहेका छन् । संकलन गरिएको स्वाब राष्ट्रिय जनस्वास्थ्य प्रयोगशाला टेकुमा पठाइने छ । 'भैरहवामा पनि प्रयोगशाला छ तर त्यहाँको प्रयोगशालाले यता नपठाउन भनेकाले काठमाडौं पठाइने छ ,' स्वास्थ्य प्रमुख ढकालले भने । परीक्षण रिपोर्ट दुई दिनमा आउने छ । जिल्लामा हालसम्म कसैमा पनि कोरोना पोजिटिभ देखिएको छैन ।
प्रतिक्रिया दिनुहोस !
