बैतडी : भारतसँग सीमा जोडिएको बैतडीको झुलाघाट नाकाबाट बिहीबार १ हजार २९९ नेपालीको उद्धार गरिएको छ । जारी लकडाउनका कारण एक महिनादेखि भारतीय क्वारेन्टाइनमा बसिरहेका नेपालीको उद्धार गरिएको प्रमुख जिल्ला अधिकारी आनन्द पौडेलले जानकारी दिए । कोरोना भाइरस ( कोभीड १९) को जोखिमका कारण स्वदेश फर्कन नपाएका नागरिकलाई बिहीबार स्वदेश फर्काइएको हो ।
भारतको पिथौरागढ जिल्ला र नेपालका बैतडी र दार्चुलाका स्थानीय प्रशासनबीच भएको सहमतिअनुसार सीमामा रहेका नेपालीलाई स्वदेश फर्काइएको प्रमुख जिल्ला अधिकारी पौडेलले बताए ।झुलाघाट नाकाबाट बैतडी सहित १३ जिल्लाका नागरिकको उद्धार गरिएको छ । झुलाघाट नाकाबाट बैतडीका ८२९, दार्चुलाका ७३, बझाङका २०९, कैलालीका ३९, कञ्चनपुरका २०, डडेल्धुराका ९ र हुम्लाका ३२ जनाको उद्धार गरिएको छ ।
यस्तै मुगुका ३०, बाजुराका १२, दैलेखका २, बर्दियाका २१, सुर्खेतका ४ र अछामका १ जनाको झुलाघाट नाकाबाट उद्धार गरिएको जिल्ला प्रहरी कार्यालयले जनाएको छ । बैतडीका नागरिकलाई सम्बन्धित पालिकाका क्वारेन्टाइनमा बस्ने गरी पठाइएको छ भने बझाङ र डडेल्धुराका नागरिकलाई पनि सम्बन्धित जिल्लामा पठाइएको जिल्ला प्रहरी कार्यालयले जनाएको छ ।
यस्तै अन्य जिल्लाका नागरिकलाई बैतडीकै क्वारेन्टाइनमा व्यवस्थापन गर्ने पहल भइरहेको र केही जिल्लाका नागरिकलाई भने सम्बन्धित जिल्लामा पठाइएको छ । यस्तै धारचुला नाकाबाट १ हजार २९६ नेपाली नागरिकको उद्धार गरिएको छ । धार्चुलाबाट बैतडीका ४७४ जनाको उद्धार गरिएको छ ।
सीमाबाट स्वदेश फर्काइएका नागरिकलाई सम्बन्धित पालिकाको क्वारेन्टाइनमा १४ दिन राखेर उनीहरुको आरडीटी परीक्षण पछि मात्रै घर पठाउने स्वास्थ्य कार्यालयका प्रमुख योगेशप्रसाद भट्टले बताए ।
उनले भने, 'हामीले सीमामा समान्य ज्वरो मात्रै जाँच गरेर नेपाली घर फर्काएका छौं । उनीहरुलाई १४ दिन क्वारेन्टाइनमा राखेर आरडीटी गरेर मात्रै घर पठाउने भनेका छौं ।'
प्रतिक्रिया दिनुहोस !
