फुङलिङ बजार आगलागीः आठ घर र ११ पसल जले, ३७ परिवार विस्थापित (तस्बिर)

ताप्लेजुङ : ताप्लेजुङ सदरमुकाम फुङलिङ बजारमा शुक्रबार रातीको आगलागीबाट आठ घरमा रहेको ११ पसल जलेका छन् । त्यहाँ बस्ने ३७ परिवार विस्थापित भएको जिल्ला विपद् व्यवस्थापन समितिले जनाएको छ । 

राती साढे १० बजे सुरु भएको आगो शनिबार बिहान मात्रै नियन्त्रणमा आएको थियो । तर, शनिबार बिहान १० बजेसम्म पनि आगलागिस्थलमा धुवाँ आइरहेको छ । फुङलिङ र फिदिम नगरपालिका, नेपाली सेना, नेपाल प्रहरी, शसस्त्र प्रहरी र स्थानीयले आगो नियन्त्रणमा खटिएका थिए । 

प्रमुख जिल्ला अधिकारी डोरेन्द्र निरौलाका अनुसार क्षतिको संकलन थालिएको छ । जस्तापाताका छाना भएको ठाउँबाट सुरु भएको आगलागीले खेम केसीको ४ तले पक्की घरसहित नेत्रबहादुर कार्की, खेमराज कार्की, चन्द्रप्रसाद निरौला, खड्ग थापा, ठगबहादुर कार्की, नारायण भट्टराईं, हस्तमाया लेछर्वो र रामकुमार शाहको घर पूर्णरुपमा जलेको छ । 

खेम केसीको घरमा अलैंची र खाद्यान्नको गोदामसहित पसल थियो भने अन्य घरमा होटल, स्टेसनरी र चिया पसल थिए । जिल्ला फुटबल संघ, जिल्ला प्याब्सन, अलैंची व्यावसायी संघ, नेपाली कांग्रस जिल्ला कार्य समितिको कार्यालय पनि जलेका छन् । आगलागीको कारण र आगो सुरु भएको घर खुलिनसकेको प्रहरीले जनाएको छ ।