लकडाउनमा जिल्ला भित्रिए १० हजार मानिस : पाँच सयको मात्र परीक्षण
वैशाख २२, २०७७ सोमबार १४:९:०
जाजरकोट : सरकारले गरेको लकडाउनकै अवधिमा करिव १० हजार मानिस जाजरकोटमा भित्रिएका छन् । तर हालसम्म पाँच सय जनाको मात्र द्रुत परीक्षण ( आरडिटी ) गरिएको छ । किट अभावमा अन्यको परीक्षण हुन नसकेको हो ।
प्रदेश सरकारले पठाएका पाँच सय आरडिटी किट परीक्षण गर्दा सबैको रिर्पोर्ट नेगेटिभ आएको छ तर धेरै संकास्पदको परीक्षण नहुँदा त्रास बढेको छ । बाँकेमा संक्रमितको संख्या बढ्दै गएपछि जाजरकोटमा समेत त्रास बढेको हो । नेपालगञ्ज स्थित महेन्द्र बहुमुखी क्याम्पसको हाताभित्र रहेको क्वारेन्टाइनबाट ११ जना भागेर जाजरकोटमा आएका थिए । जिल्लाको भेरी नगरपालिका वडा नम्बर ११ का उनीहरु मजदुरीका लागि केही समयअघि कालापार(भारत) गएका थिए ।
लकडाउन खुकुलो हुँदै गएको , लकडाउनकै अवधिमा धेरै मानिस जिल्ला भित्रिएकाले परीक्षणको दायरा बढाउनु पर्ने स्थानीयको भनाइ छ । संक्रमितहरु लुकेर बसेका हुनसक्ने भएकोले परीक्षणको दायरा बढाउनु पर्ने कुशे गाँउपालिकाका अध्यक्ष हरिचन्द्र बस्नेतले बताए ।
लकडाउनकै समयमा देशका विभिन्न शहरबाट आएकाहरुको भने किट अभावले परीक्षण गर्न नसकिएको स्वास्थ्य सेवा कार्यालयका प्रमुख टीकाराम जैसीले बताए । सबै पालिकाबाट कोरोनाको परीक्षणका लागि किट माग गरिएको छ तर जिल्लामै किट नआउँदा समस्या भएको उनले बताए । कर्णाली प्रदेशमै किट नआएकाले पठाउन नसकिएको प्रदेश सरकारले जनाएको छ । बारेकोट गाँउपालिकामा हालै मात्र दुई हजार चार मानिस जिल्ला बाहिरबाट भित्रिएका छन्।
त्यसमध्ये एक सय ६७ जनालाई क्वारेन्टाइनमा राखिएको थियो ।
विद्यालयमा बनाइएका नाम मात्रका क्वारेन्टाइनमा उनीहरुलाई ब्यवस्थापनमा समस्या भएपछि गाँउपालिकाले १४ दिन नपुगी घर पठाइदिएको छ । सबैको आरडिटी गरेर घरकै एकान्तबासमा बस्न पठाउने योजना थियो तर किट नहुँदा नमुनाको रुपमा केहीलाई मात्र परीक्षण गरेर सात दिनमै घर पठाइएको गाँउपालिका अध्यक्ष महेन्द्र शाहले बताए । एक सय ६७ जना क्वारेन्टाइनमा भए पनि ६० जनाको मात्र आरटिडी गर्दा सबैको नेगेटिभ देखिएपछि घर पठाइएको अध्यक्ष शाहले बताए ।
जिल्लामा विभिन्न स्थानमा स्थापना गरिएका क्वारेन्टाइनमा हालसम्म दुई सय ३९ जना मात्र बसेका थिए । नलगाड नगरपालिका स्थित त्रिभुवन माविमा स्थापना गरिएको क्वारेन्टाइनमा राखिएका दुई जनाबाहेक अरु सबै घर फर्किसकेका छन् । बाँकेमा एकै पटक धेरै संक्रमित फेलापरेपछि स्थानीय सरकारले थप रणनिति बनाउन थालेका छन् । बिस्तारै लकडाउन खुकुलो हुँदै जान थालेको जाजरकोटमा सरकारी निकायले पनि लकडाउन कडाइ नगर्ने रणनिति लिएको थियो । पछिल्लो घटनाक्रमले लकडाउन कडाइ गर्ने , सरकारी कार्यालय पूर्णरूपमा बन्द गर्ने र जिल्ला भित्रने नाका थप कडाइ गर्ने निर्णय गरेका छन् । भेरी नगरपालिका र बारेकोट गाँउपालिकाले सोमवार देखि नाका पुर्णरुपमा सिल गर्ने निर्णय गरेका छन् ।
प्रतिक्रिया दिनुहोस !
