जोमसोम : विश्वव्यापी माहामारीको रुपमा फैलिएको नोवल कोरोना भाईरस ( कोभिड–१९ ) रोकथाम तथा नियन्त्रणका लागि सरकारले लगाउँदै आएको लक डाउनले हिमाली जिल्ला मुस्ताङका दुर्गम भेकका महिला सुरक्षित प्रसुति सेवा प्राप्त गर्न वञ्चित छन् । लामो समयदेखिको लक डाउनले जिल्लामा सार्वजनिक तथा निजी सवारी साधन चल्न छोडेपछि दुर्गम भेकका महिलालाई सुरक्षित प्रसुति सेवा लिन अप्ठ्यारो परेको हो ।
कोरोना कहरले उब्जाएको लामो लक डाउनको सदुपयोग गर्दै मुस्ताङको वारागुङ मुक्तिक्षेत्र गाउँपालिका–१ झारकोटका स्वास्थ्यकर्मीले अहिले संस्थामा रहेको १० वर्ष पुरानो वर्थिङ उपकरण सामाग्री मर्मत गरी संञ्चालनमा ल्याएका छन् । यसअघि सुत्केरीलाई सदरमुकाम जोमसोम लैजानु पर्ने बाध्यता थियो । जीर्ण अवस्थाको पुरानो उपकरण प्रयोगमा ल्याइएपछि गाउँमै प्रसुति सेवा सम्भव भएको स्वास्थ्य संस्थाका इञ्चार्ज सुवास अधिकारीले जानकारी दिए । २०६५ सालअघि उक्त स्वास्थ्य चौकीलाई प्रसुति उपकरण उपलब्ध गराइए पनि सञ्चालनमा आउन सकेको थिएन । मर्मत गरिएको प्रसुति सेवासँगै ग्रामिण क्षेत्रका महिलाको अकाल मृत्युदर न्युनीकरण हुने संस्थाका इञ्चार्ज अधिकारीले दावी गरे ।
वारागुङ मुक्तिक्षेत्र–१ ले एकजना करारमा दक्ष स्वास्थ्यकर्मी खटाएपछि वर्थिङ सेन्टर ( प्रसुति सेवा ) संञ्चालनमा सजिलो भएको छ । वर्थिङ सुरु भएसंगै ग्रामीण भेकका महिलाले आफ्नै स्थानमा सहज रुपले प्रसुति सुविधा लिनसक्ने अर्की स्वास्थ्यकर्मी अनिता साहीले बताइन् । आइतबार वर्षौदेखि प्रयोगविहीन जीर्ण वर्थिङ उपकरण प्रयोगमा ल्याइ एक महिलालाई सुरक्षित प्रसुति गराउन सफल भएको स्वास्थ्यकर्मी साहीले जानकारी दिइन् ।
लक डाउनमा जोमसोम अस्पताल ल्याइ प्रसुति उपचार गर्न अप्ठ्यारो परेकाले गाउँकै स्वास्थ्य केन्द्रमा प्रसुति सेवा दिन सकिएको उनको भनाइ छ । आइतबार झोङकी ल्हामो गुरुङलाई सुरक्षित प्रसुति गराइएको उनले उल्लेख गरिन् ।
प्रतिक्रिया दिनुहोस !
