बैतडी : बुधबार साँझ परेको असिनापानीले बैतडीका विभिन्न स्थानमा लगाइएको गहुँबाली, तरकारीबाली, फलफूल र धानका बेर्नामा क्षति पुर्याएको छ । केही दिनदेखिको लगातार वर्षा र बुधबार परेको असिनापानीले गहुँबालीमा क्षति पुर्याएको किसानहरुले बताएका छन् ।
जिल्लाको दशरथचन्द नगरपालिका, पाटन नगरपालिका लगायतका क्षत्रमा गहुँबाली, तरकारीबाली र फलफूल खेतीमा व्यापक क्षति पुर्याएको दशरथचन्द नगरपालिका २ देहीमाडौंका माया बोहराले बताइन् । उनले भनिन्,‘असिनाले गहुँबाली सखाप पार्यो । यो वर्ष भोकमरी हुने सम्भावना छ । खेतमा लगाएको सबै बाली असिनाले नष्ट गर्यो । गाउँका मानिसहरु सबै चिन्तित बनेका छन् ।’
खेतमा पाकेको गहुँ असिनाले पूर्णरुपमा नष्ट गरेको दशरथचन्द नगरपालिका १ कविराज भट्टले बताए । उनले भने, ‘असिनाले खेत नै सेताम्य भयो । रुखका बोक्रासमेत निस्कने गरेर परेको असिनाले गहुँबाली र तरकारीबालीमा व्यापक क्षति पुर्याएको छ ।’
खेतमा पाकेको गहुँ नष्ट हुँदा भोकमरीको सम्भावना बढेको पाटन नगरपालिका ४ का भागरथी भट्टले बताइन् । उनले भनिन्, ‘बुधबार परेको असिनाले गहुँबाली, तरकारी र फलफूल खेतीमा समेत व्यापक क्षति पुर्याएको छ । खेतमा पाकेको गहुँ भित्र्याउन नपाउँदा हामी धेरै चिन्तित बनेका छौं ।’
असिनाले ब्याडमा राखेको धानको बेर्नासमेत नष्ट गरेको पाटनका वसन्त विष्टले बताए । उनले भने, ‘पाटन क्षेत्रमा धानको बेर्ना भर्खर राखिएको थियो । असिनाले धानको बेर्ना सखाप पारेको छ । भर्खर टुसाउन लागेको बेर्ना असिनाले नष्ट गरेपछि किसानहरु समस्यामा परेका छन् ।’
गहुँखेतीमा असिनाले असर गरेको कृषि ज्ञान केन्द्र बैतडीका निमित्त प्रमुख कर्णबहादुर चन्दले जानकारी दिए । केही दिन पहिला जिल्लाको पुर्चौंडी नगरपालिका र डिलाशैनी गाउँपालिकामा पनि असिनाले गहुँबालीमा क्षति पुर्याएको थियो । उनले भने, ‘जिल्लाका सबै जसो ठाउँमा यो वर्ष असिनाले गहुँबाली नष्ट गरेको छ । यो वर्ष गहुँ उत्पादनमा पनि कमी आउने देखिएको छ ।’
बैतडीमा १७ हजार ५ सय हेक्टर जमिनमा गहुँखेती गरिँदै आएको छ ।
प्रतिक्रिया दिनुहोस !
