राजविराज : सडक किनारमा रोकिराखेको ट्रकमा ठोक्किएर स. ८ प ५६२९ नम्बरको मोटरसाइकलमा सवार सप्तरीका एक युवकको बिहीबार मृत्यु भएको छ भने अर्का युवक गम्भीर घाइते भएका छन् ।
सप्तरीको अग्नीसाइर कृष्णसवरण गाउँपालिका–२ सीतापुरस्थित पूर्व–पश्चिम राजमार्गमा बिहीबार भएको दुर्घटनामा अग्नीसाइर कृष्णसवरण गाउँपालिका–४ प्रसवनीका २३ वर्षीय विक्रम सरदारको घटनास्थलमै मृत्यु भएको स्थानीय रमेश चौधरीले जानकारी दिए ।
पञ्चर भएर बिग्रिएको ना.३ख ६१२६ नम्बरको ट्रक मर्मत गर्न राजमार्गस्थित सडक किनारमा रहेको ग्यारेज अगाडि रोकी राखिएको थियो । लकडाउनका बेला माछा मारेर दिन बिताउने भन्दै दुबै जना बिहानै मोटरसाइकलमा घरबाट निक्लिएको परिवारका सदस्यले जानकारी दिएका छन् । राजमार्गस्थित इटहर्वा कनौली अगाडि रहेको गार्डेन रिसोर्टभन्दा एक सय मिटर पूर्व ग्यारेज अगाडि रोकिराखेको ट्रकमा पछाडिबाट मोटरसाइकल ठोक्किएको इलाका प्रहरी कार्यालय रुपनीले जनाएको छ ।
मोटरसाइकल पछाडि सवार अग्नीसाइर कृष्णसवरण गाउँपालिका–४ प्रसवनीका २६ वर्षीय तरुण सरदार गम्भीर घाइते भएका छन् । घाइते तरुणलाई उपचारका लागि बिराटनगरस्थित न्यूरो अस्पताल भर्ना गरिएको छ ।
प्रतिक्रिया दिनुहोस !
