कपिलवस्तु : भारतीय सुरक्षा अधिकारीले क्वारेन्टाइनमा राख्न भनी लगेका ८८ जना नेपालीलाई रात परेलगत्तै छाडिदिएका छन् ।
करिब २ घण्टा नबित्दै भारतीय सुरक्षाकर्मीहरुले उनीहरुलाई भारतका आफ्ना आफन्तजन वा पुन नेपाली सुरक्षाकर्मीहरुले थाहा नपाउने गरी नेपाल तर्फ सीमासीमा पार गर्न भनी छोडिदिएका हुन् ।
भारतीयहरुले छाडे पनि ८८ जनामध्ये केही लुकी छिपी सीमा पार गरी गाउँ फर्केका छन् भने अधिकांश फेरि सीमा क्षेत्रमै आएपछि अलपत्र परेका छन् । भारतीय क्षेत्रमा अलपत्र परेका नेपालीलाई भारत सरकारले व्यवस्थापना गर्ने र नेपाली क्षेत्रमा अलपत्र परेका भारतीयलाई नेपालले व्यवस्थापन गर्ने नेपाल भारत दुई देशबीच सहमति भए पनि सहमतिलाई भारतीय पक्षले कार्यान्वयन गरेको छैन ।
जस कारण दैनिकजसो सीमा क्षेत्रमा भारतबाट लखेटिएर आउने सर्वसाधारणको संख्या बढ्दोछ । बुधबार साँझसम्म जिल्लाका विभिन्न सीमा क्षेत्रमा ४ सय बढी सर्वसाधारणहरु अलपत्र परेका छन् । कोरोना भाइरसको संक्रमण फैलिएसँगै भारतका विभिन्न शहरबाट लखेटिएका सर्वसाधारणहरु नेपाल भारत सीमा क्षेत्रमा आउने क्रम बढेको हो ।
रोजगारीका सिलसिलामा रहेका सर्वसाधारणहरुलाई भारतीय सुरक्षाकर्मीहरुले घर फर्काउन लागेपछि भारतबाट आएका उनीहरु अलपत्र पर्न थालेका हुन् । मुम्बइमा कम्पनी बन्द भएपछि भोक भोकै पर्न थालेपछि आफुहरु भाग्दै, लुक्दै २१ दिन लगाएर सीमा क्षेत्रसम्म आइपुगेको यशोधरा गाउँपालिका वडा नं. ६ का शिव मंगल यादवले बताए ।
नेपाल-भारतको सहमतिको नाममा सीमा क्षेत्रमा नेपाली नागरिकहरु यसरी अलपत्र पर्दा जिल्लाका स्थानीय तहले विरोध जनाएका छन् । नेपाली नागरिकको व्यवस्थापनका लागि स्थानीय तहका प्रमख तथा प्रतिनिधीहरुले सरकारसँग माग गरेका छन् । सीमा नाकाको दश गजा क्षेत्रमै अलपत्र अवस्थामा रहेका नागरिकलाई क्वारेन्टाइनमा लैजान खोज्दा स्थानीय प्रशासनबाटै अवरोध सिर्जना भएको मायादेवी गाउँपालिकाका प्रमुख वजरंगी चौधरीले बताए ।
खुला आकाशमा सीमा क्षेत्रमा रात बिताएका उनीहरुलाई सर्प तथा अन्य विषालु किराहरुको टोकाइको जोखिम पनि उत्तिकै छ । अलपत्र परेकाहरुको उद्धार र क्वारेन्टाइनमा राख्ने प्रवन्ध गर्न आफ्ना भारतीय समकक्षी सिद्धार्थ नगर जिल्लाका प्रमुखसँग समन्वय गरिरहेको प्रमुख जिल्ला अधिकारी दिर्घ नारायण पौडेलले २ दिन अघिदेखि भन्दै आए पनि भारतीय पक्षसँग भने पहल सुरु भएको देखिँदैन । भारतका विभिन्न सहरबाट नेपाली सर्वसाधारणहरु घर फर्कन आउने संख्या दिनहुँ बढ्दो क्रममा रहेको सीमा क्षेत्रमा रहेका सुरक्षाकर्मीहरुले बताएका छन् ।
प्रतिक्रिया दिनुहोस !
