प्यूठानमा आरडीटी किट अभाव : परीक्षणबिना कोही घर गए, कोही क्वारेन्टाइनमै
वैशाख २९, २०७७ सोमबार १६:६:०
प्यूठान : स्वास्थ्य कार्यालय प्यूठानले ६ हजार ५ सय र्यापिड डाइग्रोस्टिक टेस्ट (आरडीटी) किट माग गरेकोमा जम्मा तीन सय थान किट जिल्लामा आएको छ । सोमबार सामाजिक विकास मन्त्रालय प्रदेश ५ ले उक्त संख्यामा किट पठाएको स्वास्थ्य कार्यालय प्यूठानका प्रमुख विशाल सुवेदीले जानकारी दिए । 'माग गरेको ६ हजार ५ सय हो, उनले भने, 'तर अत्यन्तै न्यून संख्यामा आएको छ ।' उनले प्राप्त किटलाई जिल्लास्थित विपत् व्यवस्थापन समितिमा छलफल गरेर प्रयोग गर्ने विषयमा थप योजना बनाइने जानकारी गराए ।
आपत्कालिन अवस्थालाई सुल्झ्याउनका लागि थोरै भएपनि मन्त्रालयले किट पठाएको उनको भनाइ छ । हाल जिल्लाभर क्वारेन्टाइनमा बसेका र चेकजाँच नगरी फर्किएकाको संख्या हेर्दा उक्त किट अपुग हुन्छ ।
आरडीटी किट अभाव भएपछि १४ दिनसम्म क्वारेन्टाइनमा बसेका ५ सय ५६ जना व्यक्तिहरु स्वास्थ्य जाँचबीनै घर फर्किएका छन् । अझै ५ सय २६ जना क्वारेन्टाइनमा बसिरहेका छन् ।
क्वारेन्टाइनमा बसेर चेकबीनै घर पठाउँदा थप जोखिम हुनसक्ने स्थानीयको गुनासो छ । सरकारले चेकजाँचलाई तीव्रता दिन जिल्लाबासीले माग समेत गरेका छन् । यसअघि जिल्लामा ३ सय २० वटा आरडिटी आएकोमा सबै सकिएको स्वास्थ्य कार्यालय प्रमुख सुवेदीले जानकारी दिए ।
कोरोनाको त्रास दिनप्रतिदिन बढ्दै जाँदा परीक्षणको दायरालाई सरकारले खुम्चाउँदै लगेको छ । जिल्लामा माग गरेजति किटको अभाव हुँदा स्वास्थ्यकर्मीले चाहे अनुसार सेवा प्रवाह गर्न नसकेको गुनासो पोखेका छन् ।
प्यूठान नगरपालिका १ दाखाक्वाडीमा रहेको क्वारेन्टाइनमा बसेका दुईजना युवाको आरडीटी परीक्षणमा पोजेटिभ देखिएपछि जिल्लामा थप त्रास फैलिएको छ । तर, उनीहरुको पीसीआर रिपोर्ट अझै आएको छैन् ।
सोमबार दिउँसोसम्म प्रदेश ५ मा कुल ४० जनामा कोरोना पोजेटिभ देखिएको छ । प्यूठानसँग नजिक रहेका तराईका जिल्लामा समेत कोरोना पोजिटिभ भएका व्यक्ति फेला परेपछि थप कडाइ गराउनुपर्ने जिल्लाबासीको आग्रह छ ।
प्रतिक्रिया दिनुहोस !
