नवलपरासीमा दुईजना कोरोना संक्रमित, अस्पताल नै खाली गरेर संक्रमित राखियो

परासी : पश्चिम र पूर्वी नवलपरासीमा कोरोनाभाइरसका दुईजना संक्रमित भेटिएका छन् ।

दुबै जिल्लामा पहिलो पटक संक्रमित भेटिएको पुष्टि भएको हो । कोरोना पुष्टि हुनेमा पश्चिम नवलपरासी प्रतापपुर गाउँपालिका–५ बड्की बैदौलीका ३६ वर्षीय पुरुष र पूर्वी नवलपरासी देवचुली नगरपालिका– १२ का पनि ४९ वर्षीय पुरुष छन् । उनीहरु दुवै ४ दिनअघि भारतबाट आएका थिए ।

पश्चिम नवलपरासीमा फेला परेका संक्रमित झोलनीपुर नाकाबाट रातको समयमा लुकेर आएको बुझिएको छ । दिल्लीबाट आएका उनलाई भोलिपल्ट गाउँपालिकाले बनाएको क्वारेन्टाइनमा लगेर राखिएको थियो । क्वारेन्टाइनमा रहेका ३० जनाको स्वाब परीक्षण गरिएकोमा उनको रिपोर्ट पोजिटिभ आएको हो । पूर्वी नवलपरासीका पुरुष भने विरगञ्ज नाका हुँदै आएका थिए । सामान्य लक्षणसहित आएका उनी घर नआइ सोझै भरतपुर अस्पताल कोभिड–१९ प्रयोगशालामा पुगेका थिए । त्यहाँ उनलाई कोराना भएको पुष्टि गरिएको हो ।

यसैबीच पश्चिम नवलपरासीमा फेला परेका संक्रमितलाई राख्न परासी सदरमुकामस्थित पृथ्वीचन्द्र अस्पताल नै खाली गराइएको छ । अस्पतालमा भर्ना भएका बिरामीहरु संक्रमित हुन सक्ने भएकाले सबैलाई घर पठाएर उनलाई अस्पतालमा राखिएको अस्पतालका मेडिकल सुपरिटेण्डेण्ट डा. मोहम्मद नुरुल होदाले बताए । संक्रमित राख्न थालेपछि जिल्ला अस्पतालले यसअघि सञ्चालन गर्दै आएको ओपडी सेवासहित सामान्य सेवाहरु बन्द गरेको छ । बिहीबारदेखि इमर्जेन्सी, ज्वरो क्लिनिक र प्रसूति सेवाबाहेक सबै सेवा बन्द गरिएको होदाले बताए ।

भारतबाट जिल्ला भित्रिने नेपालीको संख्या बढ्दै गएकाले अस्पताललाई नै आइसोलेसन केन्द्र बनाउने तयारी गरिएको छ । अस्पतालमा १० बेडको आइसोलेसन कक्ष बनाइएको छ । बुटवल र भैरहवामा रहेका कोरोना उपचार केन्द्रमा ठाउँ अभाव रहेकाले जिल्ला अस्पताललाई नै आइसोलेसन केन्द्र बनाउने बारे छलफल भइरहेको डा. होदाले बताए ।