बैतडी : जिल्लाको मेलौली नगरपालिका ५ की दशरथ दयालकी छोरीको यही वैशाख पहिलो साता लडेर हात भाँचियो । हतार हतार छोरी लगेर उनी नजिकैको केशरपुर प्राथमिक स्वास्थ्य केन्द्रमा पुगे । प्राथमिक स्वास्थ्य केन्द्रका स्वास्थ्यकर्मीले एक्सरे गरे। रिपोर्टमा हात फ्याक्चर भएको देखियो। तर प्राथमिक स्वास्थ्य केन्द्रमा थप उपचार गर्ने चिकित्सक नहुँदा उनले डडेल्धुरा जानु पर्यो ।
घर नजिकैको स्वास्थ्य संस्थामा चिकित्सक नभएपछि महंगोमा एम्बुलेन्स बुक गरेर डडेल्धुरा पुर्याउन परेको उनले गुनासो सुनाए । उनले भने,'घर नजिककै प्राथमिक स्वास्थ्य केन्द्रमा डाक्टर नहुँदा हामीलाई धेरै समस्या भएको छ । लकडाउनका बेला अन्य सवारी साधन पनि नचल्ने अनि महंगोमा एम्बुलेन्सबाट छोरीलाई अस्पताल पुर्याउनुपर्यो।'
मेलौली ९ का ११ वर्षीय महादेव भट्टको पनि हात फ्याक्चर भएपछि उनका अभिभावकले केही दिनअघि केशरपुर प्राथमिक स्वास्थ्य केन्द्र पुर्याए । डाक्टर अभावमा भट्टलाई पनि प्राथमिक स्वास्थ्य केन्द्रले अन्यत्र रेफर गरिदियो ।
घर नजिकको प्राथमिक स्वास्थ्य केन्द्रमा डाक्टर नहुँदा समस्या भोगेका यी दुई उदाहरण मात्रै हुन् । तर केशरपुर प्राथमिक स्वास्थ्य केन्द्र मेलौलीमा डाक्टर नहुँदा दैनिक बिरामीलाई अन्यत्र रेफर गर्नुपर्ने बाध्यता भएको हेल्थ असिष्टेन्ट मुकेशकान्त दयालले बताए ।
उनले भने, 'प्राथमिक स्वास्थ्य केन्द्रमा डाक्टरको दरबन्दी छ । तर दरबन्दी पूर्ती नहुँदा सेवाग्राहीलाई समस्या छ । लकडाउनका कारण गाडी नचलेपछि स्थानीय थप समस्यामा परेका छन्।'
केशरपुर प्राथमिक स्वास्थ्य केन्द्र स्थापना भएको १६ वर्षपछि २०७५ सालमा एकजना डाक्टर आएपनि पछिल्लो एक वर्ष यता प्राथमिक स्वास्थ्य केन्द्र डाक्टरबिहीन छ । प्राथमिक स्वास्थ्य केन्द्रमा डाक्टर नहुँदा एक्सर, इसीजीलगायतका सेवा पनि सूचारु गर्न नसकिएको हेल्थ असिष्टेन्ट दयालले बताए । उनले भने, ' रेफरल सेन्टरमै डाक्टर नहुँदा सेवा दिन सकेको छैन् ।'
तल्लोसोराड क्षेत्रका नागरिक भारतीय सिमावर्ती अस्पतालमा जाने गरेको भएपनि लकडाउनका कारण त्यहाँ जान संभव छैन।
प्रतिक्रिया दिनुहोस !
