मुख्यमन्त्रीसँग सिडिओको गुनासो : क्वारेन्टाइन रोगका घर भए

परासी : प्रदेश ५ का मुख्यमन्त्री शंकर पोखरेलसँग पश्चिम नवलपरासीमा प्रमुख जिल्ला अधिकारी बासुदेव दाहालले कोरोना नियन्त्रणमा भइरहेका गतिवधिमा आफूले सहयोग पाउन नसकेको भन्दै गुनासै गुनासो राखेका छन् । कोरोना संक्रमणविरुद्ध स्थानीय तहले अहिलेसम्म सञ्चालन गरेका गतिविधि र समस्याका बारेमा जानकारी लिन शनिबार पश्चिम नवलपरासीको सुनवल पुगेका मुख्यमन्त्री पोखरेलसँग क्वारेन्टाइन व्यवस्थापनदेखि लकडाउन कार्यान्वयनमा आफूले सभासद्देखि राजनीतिक दलबाट सोचेअनुरुप सहयोग नपाउँदा समस्या भएको भन्दै प्रजिअ दाहालले गुनासो गरे ।

मुख्यमन्त्री पोखरेलसँग गुनासा राख्दै प्रजिअ दाहालले भने, 'माननीय मुख्यमन्त्रीज्यू मैले जिल्लामा भइरहेका कोरोना नियन्त्रणका उपाय र लकडाउनको अवस्थामा भइरहेका गतिविधिका बारेमा नढाँटी भन्नु पर्छ, जिल्लामा निर्माण भएका क्वारेन्टाइन व्यवस्थित र सुरक्षित छैनन् । क्वारेन्टाइन रोग निम्ताउने घर भएका छन् । यसलाई व्यवस्थित गर्न जरुरी छ । ' 

दिनहुँजसो भारतबाट आउने नेपालीको संख्या बढ्दो भए पनि उनीहरुलाई व्यवस्थापन गर्न समस्या भएको उनको भनाइ छ । 'सरकारले भारतबाट आउनेलाई सीमामा होल्ड गरेर राख्ने र पीसीआर परीक्षणपछि मात्र सम्बन्धित पालिकाका क्वारेन्टाइन वा आइसोलेसनमा पठाउने भनेको छ । तर स्वास्थ्य सामाग्री कम हुँदा समस्या भएको छ',  प्रजिअ दाहालले भने । हप्ता दिनमा १ हजार बढी भारतबाट जिल्ला भित्रिएका छन् । जसमा ४ सयको पीसीआर गरेर पठाइएको र अन्यको स्वास्थ्य सामाग्री अभावमा परीक्षण गर्न समस्या भएको उनले बताए । 

जिल्लामा रहेका विभिन्न क्वारेन्टाइनमा अहिले ५ सय जना छन् । भारतबाट आउनेको संख्या बढिरहेकाले जिल्लामा ३ देखि ५ हजार बेडको व्यवस्थित क्वारेन्टाइनको आवश्यक रहेको उनले मुख्यमन्त्रीलाई जानकारी गराए ।  'क्वारेन्टाइन बनाउँदा लाग्ने खर्च बेरुजु देखिने भन्दै स्थानीय तहले गुनासो गरेका छन् । यसले पनि समस्या पारेको छ', उनले भने । जिल्लामा आइसोलेसन नहुँदा संक्रमित बढे झन समस्या हुने उनको भनाइ छ । जिल्लामा देखिएका एक संक्रमितलाई भैरहवा भीम अस्पताल पाठइएको छ ।
  
लकडाउन कार्यान्वयन पनि फितलो भएको उनको गुनासो छ । सभासद र राजनीतिक दलको सहयोग नपाउँदा लकडाउन कार्यान्वयमा समस्या भएको उनको तर्क छ । 'मुख्यमन्त्रीज्यू हजुरकै अगाडि प्रदेश सभासद्हरु बसिरहनु भएको छ । उहाँहरुले लकडाउनलाई किन कडाई गरेको भन्दै मेरै कार्यकक्षमा आएर औला ठडाउनुहुन्छ । कुन विषयमा कसरी बोल्नुपर्छ भन्ने हेक्का नराखी बौलिदिँदा समस्या भएको छ । यसरी मैले कसरी काम गरु ? ',  उनले गुनासो गरे ।

उनले जिल्लामा प्रहरीको संख्या कमी भएकाले पनि लकडाउन र क्वारेन्टाइनको सुरक्षामा केही चुनौती देखिएको बताए । नेपाली सेनालाई क्वारेन्टाइन व्यवस्थापनको जिम्मा दिन सके प्रहरीलाई सीमा र अन्य गतिविधिमा लगाउन सहज हुने उनको भनाइ छ । 'यसबारे मैले केन्द्रमा पनि सुझाव दिएको छु । नेपाली सेनालाई क्वारेन्टाइनको व्यवस्थापकीय जिम्मेवारी दिन सके काम गर्न सहज हुन्थ्यो ', उनले भने ।

प्रजिअका गुनासा सुनेपछि मुख्यमन्त्री पोखरेलले व्यवस्थित क्वारेन्टाइनको संख्या बढाउन जिल्ला स्तरीय कोरोना नियत्रण समिति मार्फत पालिकाहरुलाई निर्देशन  दिइने बताए । स्थानीयले तहले निर्माण गर्ने क्वारेन्टाइनको खर्च व्यवस्थापनबारे मुख्यमन्त्री पोखरेलले भने, 'क्वारेन्टाइनमा लागेको खर्च अभिलेखीकरण गरेर राख्नुस् । त्यसको सोधभर्ना केन्द्रीय कोभिड कोषले उपलब्ध गराउँछ । '  प्रहरीको संख्या देशभर नै कमि रहेको भन्दै मुख्यमन्त्री पोखरलेले प्रदेशको मातहतमा हुने काम प्रदेशबाटै र गर्न नसकिने काम संघीय सरकारबाट पहल गर्ने आश्वासन दिए । कोरोनाबाट बँच्ने एउटै औषधि सामाजिक दुरी रहेकाले लकडाउन कार्यान्वयनमा सबैले सहयोग गर्नुपर्नेमा मुख्यमन्त्री पोखरेलले जोड दिए ।  

छलफल कार्यक्रममा भौतिक पूर्वाधार विकासमन्त्री एंव सरकारका प्रवक्ता बैजनाथ चौधरी, जिल्लाबाट प्रतिनिधित्व गर्ने प्रदेश सदस्यहरु, जिल्लाका ७ वटै स्थानीय तहका प्रमुख, जिल्ला समन्य समितिका प्रमुख, स्वास्थ्य प्रमुख जिल्लास्थित सुरक्षा निकायलगायतको सहभागिता रहेको थियो ।