जोमसोम : हिमाली जिल्ला मुस्ताङका ५ वटै स्थानीय तहमा कोरोना कहरले सृजित लक डाउनकाबीच खोप कार्यक्रम भएको छ । यसअघि कोरोना कहरले रोकिएको नियमित खोप कार्यक्रम आइतबारदेखि सूचारु भएको हो ।
जन्मेदेखि १५ महिनासम्मका नवजात शिशुलाई लगाइने नियमति खोप जिल्लाका १५ स्थानका स्वास्थ्य शाखा, प्राथमिक स्वास्थ्यकेन्द्र र जिल्ला अस्पतालको पालिका खोपकेन्द्रमा सुरु भएको जिल्ला स्वास्थ्य कार्यालय मुस्ताङले जनाएको छ । नियमति खोप कार्यक्रम जेठ ४ देखि जेठ ८ गतेसम्म संञ्चालन हुने जनाइएको छ ।
यसअघि जिल्लामा हुने नियमित खोप कार्यक्रम २ महिना लामो लक डाउनले स्थगित हुँदै आएको थियो । पछिल्लो समय कोरोना संक्रमित वृद्धि भइरहेको र बन्दाबन्दीको अवस्थाले खोप कार्यक्रम अन्योल बनेको थियो । संम्भावित कोरोनालाई मध्यनजर गर्दै सामाजिक दुरी अपनाएर खोप कार्यक्रम पूनः सूचारु गरिएको जिल्ला स्वास्थ्य प्रमुख टिकाराम भण्डारीले जानकारी दिए । कोरोना भाइरस ( कोभिड–१९) ले सृजित लक डाउनले जिल्लाभित्र खोप कार्यक्रम प्रभावित हुँदै आइरहेको स्वास्थ्य प्रमुख भण्डारीले उल्लेख गरे । बालबालिकालाई लाग्न सक्ने विभिन्न रोगसँग जुध्नका लागि खोपको मात्रा पूरा गर्नुपर्ने हुन्छ । बालबालिकाको स्वास्थ्य रक्षाका निम्ति लगाइने खोप कार्यक्रममा कुनै पनि बालबालिका बन्चित नहुन् भन्ने हेतुले उच्चसजगता अपनाएर स्वास्थ्यकर्मीले खोप कार्यक्रमलाई निरन्तरता दिइएको स्वास्थ्य प्रमुख भण्डारीले बताए ।
लक डाउनकैबीच सबै जिल्लाका स्वास्थ्य शाखा तथा खोपकेन्द्रमा स्वास्थ्यकर्मीले माक्स, ग्लोब्स लगायतका समाग्री उपयोग गर्ने र खोप लगाउनु अघि सेनेटाइजरले राम्ररी हात धोएर नवजात शिशुलाई नियमित खोपको मात्रा प्रदान गरिन लागिएको हो । विभिन्न ११ प्रकारका रोगविरुद्ध लगाइने सरकारले निःशुल्क बिसीजी डिपिटी र पोलियो लगायतका खोप उपलब्ध गराउँदै आइरहेको जिल्ला स्वास्थ्य कार्यालयले जनाएको छ ।
प्रतिक्रिया दिनुहोस !
