विराटनगर : भारतबाट नेपाल फर्किएका झापाका एक युवकमा कोरोना संक्रमण पुष्टि भएको छ । सोमबार गरिएको पिसिआर परिक्षणमा झापा कचनकवल गाउँपालिका ६ का ती युवकमा कोरोना पुष्टि भएको मुख्यमन्त्री तथा मन्त्रिपरिषदको कार्यालयमा रहेको कोरोना सूचना डेस्कले जनाएको छ ।
भारतमा रेल खुलेपछि गत जेठ २ गते नेपाल भारत सीमाना आइपुगेका ती युवा सहित ३० जनाको समूहलाई भारतीय सीमा सुरक्षा बल (एसएसबी)ले नेपालका सुरक्षाकर्मी र जनप्रतिनिधिसँगको आपसी समझदारीमा नेपाल पठाएको थियो ।
नेपाल ल्याएर उनीहरुलाई कचनकवलमा नै बनाइएको क्वारेन्टाइनमा राखी स्वाब संकलन गरी विराटनगर ल्याइएको थियो । ३० जना मध्ये १ जनामा कोरोना पुष्टि भएको रिपोर्ट आएपछि सोमबार साँझनै ती युवकलाई विराटनगर पठाइएको कचनकवल गाउँपालिका अध्यक्ष अञ्जार आलमले जानकारी दिए ।
ती युवकलाई एम्बुलेन्समा ल्याएर विराटनगरको कोरोना विशेष अस्पतालमा भर्ना गरिएको प्रदेश १ का सामाजिक विकास मन्त्री जीवन घिमिरेले जानकारी दिएका छन् । यससँगै प्रदेश १ मा कोरोना संक्रमितको संख्या ४१ पुगेको छ । सोमबार मात्रै मोरङ रतुवामाई नगरपालिकाका एक युवकमा पनि कोरोना पुष्टि भएको थियो ।
प्रतिक्रिया दिनुहोस !
