पश्चिम नवलपरासीमा भारतबाट आउनेको संख्या १२ सय बढी, थप एकजनामा कोरोना संक्रमण

परासी : लकडाउनपछि भारतबाट पश्चिम नवलपरासीमा आउनेको संख्या १२ सय बढी पुगेको छ । जसमा ५ सय बढी क्वारेन्टाइनमा बसेर घर गएका छन् भने बुधबार बिहानसम्म क्वारेन्टाइनमा बस्नेको संख्या ६ सय ७६ जना रहेको स्वास्थ्य कार्यालयका प्रमुख गौरव ढकालले जानकारी दिए ।

क्वारेन्टाइनमा बस्ने सबै भारतबाट आएका हुन् । भारतबाट आउने क्रम अझ पनि नरोकिएपछि पालिकाले वडास्तरमा पनि क्वारेन्टाइनको संख्या थप्न थालेका छन् ।  दिनहुँजसो सीमा नाकाबाट ७० देखि १ सय जनासम्म जिल्ला भित्रिने गरेको पालिकाले जनाएका छन् । ७ स्थानीय तह रहेको जिल्लाका चार गाउँपालिका भारतीय सीमासँग जोडिएका छन् । 

प्रतापपुर, पाल्हीनन्दन, सरावल र सुस्ता गाउँपालिका सीमासँग जोडिएका छन् । ती गाउँपालिकाका क्वारेन्टाइनमा बस्नेको संख्या बढी छ । सबैभन्दा बढी सरावलमा १ सय ४३, सुस्तामा १ सय ३७, पाल्हीनन्दनमा १ सय ३६ जना र प्रतापपुरमा १ सय ३ जना क्वारेन्टाइनमा छन् । 

यसैबीच पछिल्लो पटक बुधबार सुस्ता गाउँपालिका-५ का २६ वर्षीया पुरुषमा कोरोना संक्रमण भएको पुष्टि भएको छ । गाउँपालिमा रहेका क्वारेन्टाइनबाट ५५ जनाको स्वाब संकलन गरेर पठाइएको थियो ।

जसमा ४१ जनाको मात्र रिपोर्ट आएको र एकजनामा पोजिटिभ देखिएको स्वास्थ्य प्रमुख ढकालले जानकारी दिए । बेलावानी स्वास्थ्य चौकीको क्वारेन्टाइनमा बसेका उनी भारतको मुम्बईबाट आएका थिए।

उनीसहित भारतबाट आएका सबैलाई सिधैं क्वारेन्टाइनमा लगेर राखिएको बताइए पनि त्यसबारे सोधखोज भइरहेको स्वास्थ्य कार्यालयले जनाएको छ । यसअघि पश्चिम नवलपरासी प्रतापपुर गाउँपालिका-५ बड्की बैदौलीका ३६ वर्षीया पुरुषमा कोरोना संक्रमण पाइएपछि उनलाई भैरहवा भीम अस्पताल पठाइएको छ । उनी पनि भारतबाट आएका थिए । जिल्लामा व्यवस्थित आइसोलेसन नहुँदा संक्रमितलाई अन्यन्त्र पठाइने गरिएको छ । 

भारतबाट आउनेको संख्या बढदै गएको र संक्रमितहरु देखा पर्न थालेपनि व्यवस्थित आइसोलेसन बनाउनतर्फ पहल भएको छैन। पृथ्वीचन्द्र जिल्ला अस्पतालमा १० बेडको आइसोलेसन बनाइएको छ तर उपकरण र स्वास्थ्य सामग्री अभावले सञ्चालनमा ल्याउन सकिएको छैन ।