मलंगवा : सर्लाहीको मलंगवास्थित नेपाल -भारत सीमा नजिक फसेका इँट्टा भाटामा काम गर्ने भारतीय मजदुरलाई नेपालीले नि:शुल्क खाना र खाजाको व्यवस्था गरेका छन् । मंगलबार बिहानैदेखि घर जानका लागि मलंगवा आएका करिब ८ सय भारतीय मजदुरलाई युवाहरुले खाना र खाजा खुवाउन थालेका छन् ।
बालबालिका सहित सीमा क्षेत्रमा भोक भोकै बसेका मजदुरहरुको दैनिक जीवन कष्टकर बन्न थालेपछि खाना खाजा खुवाउन थालेको युवाहरुले बताए । मलंगवा २ का मनोज यादव, तपेश्वर यादव, मोहन कुर्मी र इन्द्रजित साहले व्यापारीसँग सहयोग मागेर खाना र खाजा खुवाउन थालेका हुन् ।
मंलगबार बिहान सबैजनालाई खाना खुवाएको मनोज यादवले बताए । बेलुका खानाका लागि रकम अपुग हुँदा च्युरा र तरकारी खुवाएको उनको भनाइ छ । आज (बुधबार) बिहान फेरि च्युरा तरकारी सबैजनालाई नास्ताको रुपमा खुवाएको बताएका छन् । स–सना बालबालिका भोकै छटपटाइरहेको देखेपछि केही व्यापारीसँग सहयोग मागेर उनीहरुलाई खाना र खाजा खुवाउन थालेको हो । आलु व्यापारीहरुसँग आलु, किराना व्यापारीहरुसँग च्युरा मशलाहरु सहयोग मागेर खाना र खाजाको व्यवस्था गरेको उनले बताए ।
कोरोना महामारीभन्दा पनि भोकले नै मर्ने अवस्था आउन नदिनका लागि आफूहरु अगाडि आएको इन्द्रजित साहले बताएका छन् । मानवताको नाताले सहयोग गरेको उनले बताए । इँट्टा भट्टा मालिकले सीमा क्षेत्रमा अलपत्र छाडेपछि उनीहरुको दैनिकी झन कष्टकर बनेको साहको भनाइ छ ।
भोकै बसेको देख्दा दाया लागेर मलंगवा २ का राजेश सिंह पनि च्युरा, दालमोठ, नुन र खुर्सानी बोकेर सीमा क्षेत्रमा आएका छन् । ४ जनाको सहयोगमा केही राहत लिएर आफू पनि उनीहरुको भोक टार्नका लागि आएको उनले बताए । ४ बोरा च्युरा, ५ किलो दालमोठ नुन र खुर्सानी उनले ल्याएका छन् । छिमेकीहरु नरेश झा, बिमलेश झा र जितेन्द्र पण्डितको सहयोगमा समान लिएर आएको उनले बताए ।
मालिकले अलपत्र छाडेपछि आफूहरुको जीवन कष्टकर भएको भारतको उत्तर प्रदेश रायबरेलीका अमिक कुमार बताउँछन् । खुला आकाशमुनि चौरीमा दुईदिनदेखि भोकै बस्दै आएको उनले बताए। मलंगवाका युवाहरु खाना र खाजा लिएर नआएको भए बालबालिका पनि भोक भोकै बस्नु पर्ने उनले बताए । खाना र खाजा सहयोग गरेर ठूलो गुण लगाएको अमित कुमारले बताएका छन् । ‘यस्ता मनकारी युवाहरुलाई सलाम गर्न चाहन्छु’, अमितले भने, ‘दुई देशका नातालाई छोडेर उहाँहरुले मानवताको नाताले ठूलो उपकार गरेका छन् ।’
सर्लाहीमा रहेको ९० ओटा इँट्टा भट्टामा करिब ८ देखि १० हजारसम्म भारतीय मजदुरहरु काम गर्दै आएका छन् ।
प्रतिक्रिया दिनुहोस !
