बैतडी : भारतबाट फर्केपछि आइसोलेसन भर्ना भएका बैतडीका ३ जनाको पीसीआर रिपोर्ट नेगेटिभ आएको छ । सिगास गाउँपालिका ९ चौखामका ३३,२२ र २० वर्षीय ३ पुरुषको पीसीआर रिपोर्ट नेगेटिभ आएको जिल्ला अस्पताल बैतडीका ल्याब असिस्टेन्ट चन्द्रसिंह डोबालले जानकारी दिए ।
गत वैशाख १८ गते झुलाघाट नाकाबाट उद्धार गरेर ल्याइएका उनीहरु सबैलाई गत शनिवारसम्म श्रीभावर क्वारेन्टाइनमा राखिएको थियो। शनिबार आरडीटि परीक्षण गर्दा ३३ वर्षीय पुरुषको आरडीटी पोजेटिभ देखिएको थियो ।
आरडीटी परीक्षणमा पोजेटिभ देखिएपछि उनीसँगै रहेका २२ र २० वर्षीय युवकको पनि थ्रोट स्वाब संकलन गरी पीसीआर परीक्षणका सेती प्रादेशिक अस्पताल धनगढी पठाइएकोमा सबैको रिपोर्ट नेगेटिभ आएको हो ।
श्रीभावरस्थित आइसोलेसन भर्ना भएका तीनैजनाको पीसीआर रिपार्ट नेगेटिभ आएपछि डिस्चार्ज गरिएको सिगास गाउँपालिकाका स्वास्थ्य शाखा प्रमुख जनकसिंह धामीले बताए । उनले भने, 'आरडीटी रिपोट पोजेटिभ आएका एकजना र उनीसँगै रहेका दुई अरुको गरेर हामीले तीनजनाको थ्रोट स्वाब संकलन गरेर पठाएका थियौं । तीनैजनाको पीसीआर रिपोट नेगेटिभ आएपछि घर पठाएका छौं ।'
यसअघि वैशाख १८ गते धार्चुला नाकाबाट उद्धार गरी ल्याइएका डिलाशैनी गाउँपालिका १ का ५० वर्षीय पुरुषको पीसीआर नेगेटिभ आएको थियो । उनको आरडीटी रिपोट पोजेटिभ आएपछि थ्रोट स्वाब संकलन गरेर कोरोना परीक्षण गरिएको थियो।
प्रतिक्रिया दिनुहोस !
