परासी : नेपाल पत्रकार महासंघ पश्चिम नवलपरासी जिल्ला शाखाले शाखामा आवद्ध सदस्य पत्रकारको कोरोना बीमा गराएको छ । बीमा रकम प्रति व्यक्ति ५० हजारको छ । पश्चिम जिल्ला भारतसँग सीमाना जोडिएको र उच्च जोखिममा रही समाचार संकलन गर्नु परेकाले शाखामा आवद्ध सबै सदस्यको बीमा गरिएको शाखा सचिव राजकुमार रेश्मीले बताए ।
शाखामा ६३ जना सदस्य आवद्ध छन् । आवद्ध सदस्यमध्ये केही विदेशमा रहेको र केहीको यसअघि नै बीमा भइसकेकाले १ जना कर्मचारीसहित ४९ जना सदस्यको बीमा गरिएको सचिव रेश्मीले जानकारी दिए ।
जनरल इन्स्योरेन्स कम्पनी शाखा कार्यालय, पश्चिम नवलपरासीमार्फत बीमा गरिएको हो । बीमावापत लाग्ने सम्पूर्ण खर्च पत्रकार महासंघ जिल्ला शाखाले व्यहोरेको हो । कोरोना परीक्षण गर्दा कुनै पनि व्यक्तिको पीसीआर पोजेटिभ रिपोर्ट आए बीमा रकम उपलब्ध हुने बीमा कम्पनीका शाखा प्रबन्धक नारायण न्यौपानेले जानकारी दिए ।
कोरोना संक्रमणविरुद्ध अग्रपंक्तिमा रहेका पत्रकारको मनोबल उच्च बनाउन सरकारबाट कुनै सहयोग उपलब्ध नभएको अवस्थामा शाखामा आवद्ध पत्रकारहरुलाई पेशाप्रति उत्साहित बनाउन बीमा गरिएको सचिव रेश्मीले बताए ।
सरकारी निकायबाट कुनै सहयोग प्राप्त नभएपनि शाखाले आवद्ध सदस्य र जिल्लामा कार्यरत अन्य पत्रकारलाई स्वास्थ्य सामाग्री, प्रेसज्याकेट लगायतका सामाग्रीहरु उपलब्ध गराउँदै आएको छ ।
यसैबीच पत्रकार महासंघले जिल्लामा कार्यरत सम्पूर्ण पत्रकारहरुको पीसीआर परीक्षणका लागि सम्बन्धित निकायसँग समन्वय गरिरहेको शाखाले जनाएको छ।
प्रतिक्रिया दिनुहोस !
