राजविराज : सप्तरीमा बिजुलीको करेन्ट लागेर तीन दिनको अवधिमा तीनजनाको मृत्यु भएको छ । बोदे बरसाईन नगरपालिका-९ मा बिहीबार करेन्ट लागेर ४० वर्षीया मिरकुन सदाको मृत्यु भएको जानकारी दिँदै सप्तरी प्रहरीले तीन दिनको अवधिमा तीनजनाको मृत्यु भएको जनाएको छ ।
बिजुली बत्तीको होल्डरमा प्लग लगाई बत्ती बाल्ने क्रममा करेन्ट लागेर घाइते भएकी सदाको उपचारका क्रममा अस्पताल लैजाने क्रममा बाटोमा मृत्यु भएको परिवारका सदस्यले बताए। मृतक परिवारका सदस्यका अनुसार बोदे बरसाईन ५ स्थित जिवन दिप हस्पिटलका चिकित्सकले अस्पताल ल्याउना साथ सदालाई मृत घोषणा गरे । उनको शवलाई राजविराजस्थित गजेन्द्रनारायण सिंह सगरमाथा अस्पताल ल्याउने तयारी भइरहेको छ ।
बुधबार डाक्नेश्वरी नगरपालिका तथा मंगलबार खडक नगरपालिकामा करेन्ट लागेर एक पुरुष र एक महिलाको मृत्यु भएको जिल्ला प्रहरी कार्यालय, सप्तरीले जनाएको छ । डाक्नेश्वरी नगरपालिका-१० का ३६ वर्षीय रन्जितकुमार साहको घरमा मोटर जडान गर्ने क्रममा मृत्यु भएको थियो ।
यसैगरी खडक नगरपालिका-३ की २२ वर्षीया बबिताकुमारी मण्डलको खेतमा घाँस काटिरहेकीका बेला करेन्ट लागेर मृत्यु भएको थियो ।
प्रतिक्रिया दिनुहोस !
