धादिङ : धादिङको गंगाजमुना गाउँपालिका वडा नं ४ स्थित गुम्दी स्वास्थ्य चौकीमा लामो समय बसेर काठमाडौं गएका लमजुङ जिल्लाका साढे २ वर्षका बालकमा कोरोनाको संक्रमण देखिएपछि उनी बसेको स्वास्थ्य चौकी र आसपासका क्षेत्र सिल गरिएको छ । साथै स्वास्थ्य चौकीबाट प्रदान गरिने सम्पुर्ण सेवाहरु अनिश्चितकालको लागि बन्द गरिएको छ । सरकारले लकडाउन घोषणा गरेपछि काठमाडौंमा रहेका ती बालक आफ्नी आमासँगै मामाघरको हजुरबुवा कार्यरत गुम्दी स्वास्थ चौकीमा गत चैत १२ गते आएका थिए ।
गत बैशाख २९ गते आमासहित काठमाडौं फर्किएका उनीहरुलाई घरवबेटीले कोरोना चेकजाँच गर्न लगाएपछि परीक्षण गर्दा बालकमा कोरोनाको संक्रमण पोजिटिभ देखिएको थियो । सँगै रहेकी बालकको आमालाई भने कोरोना देखिएको छैन ।
जिल्ला सुरक्षा समितिले ती बालकका हजुरबुवा कार्यरत गुम्दी स्वाथ्य चौकीको सम्पुर्ण सेवा बन्द गराएको छ भने उनी बसेको घरक्षेत्रका चारकिल्ला तोकेर सिल गरिएको छ । स्वास्थ्य चौकी रहेको पूर्वमा सुर्दुङ खोला, पश्चिममा सातदोवाटो जाने बाटो, उत्तरमा धंगारचौर र दक्षिणमा सताहखोलाबीचको क्षेत्र पूर्ण रुपमा सिल गरि निषेधाज्ञा जारी गरिएको जिल्ला सुरक्षा समितिका संयोजक एवं प्रमुख जिल्ला अधिकारी अस्मान तामाङले जानकारी दिए ।
ती बालकका हजुरबुबासहित उनको सम्पर्कमा आएकाहरू, गुम्दीमा उनीहरूले डेरा लिएको घरका परिवारको कन्ट्याक्ट ट्रेसिङ गरी स्वाब संकलन गर्न थालिएको स्वास्थ्य कार्यलय धादिङका महामारी फोकल पर्सन दिपक अछामीले जानकारी दिए । उनले भने, ‘पहिलो चरणमा हाल २९ जनाको स्वाब संकलन गरेको छौँ, पिसिआर परीक्षणको लागि बिहीबार नै काठमाडौं पठाउने छौँ ।’
गुम्दी स्थित ती स्वास्थ्यकर्मीले डेरा लिएर बसेको क्षेत्रवरपर १५-२० वटा स्थानीयका घरहरु रहेका छन् । गंगाजमुना गाउँपालिकाका स्वास्थ्य संयोजक दीपक अधिकारीले भने, ‘डेरावरपरका परिवारको पनि लगत संकलन गर्दै छौं, सबैभन्दा नजिकका नातेदारको पीसीआर गरेपछि त्यसको नतिजा बमोजिम थप कारबाही अगाडि बढाउँनेछौँ ।’
धादिङ अस्पतालका ८ जना स्वास्थ्यकर्मीमा आरडीटी पोजिटिभ
जिल्ला अस्पताल धादिङका कर्मचारीहरुमा कोरोना भाइरसको आरडिटी गर्दा ७ जनामा पोजिटिभ देखिएको छ । बुधबार जिल्ला अस्पताल धादिङबाट आकस्मिक बाहेकका सेवाहरु बन्द गरेर ७९ जना स्वास्थ्यकर्मी तथा कर्मचारीहरुको आरडीटी गरिएको थियो ।
पोजिटिभ देखिएका सबै कर्मचारीको स्वास्थ्य अवस्था सामान्य रहेको र पिसिआर परीक्षणको रिपोर्ट नआएसम्म उनीहरुलाई आइसोलेसनमा राखिएको जिल्ला अस्पताल धादिङका सुचना अधिकारी विक्रम विकले जानकारी दिए ।
७ जनाको आरडीटी पोजिटिभ देखिएपछि जिल्ला अस्पताल धादिङले एक विज्ञप्ती जारी गर्दै पिसिआर रिपोर्ट नआएसम्मको लागि अस्पतालबाट प्रदान गरिने ओपीडी सेवा पूर्ण रुपले बन्द गरिएको जानकारी दिएको छ ।
जिल्ला अस्पताल धादिङका निमित्त मेडिकल सुपरीटेण्डेण्ट डाक्टर दीपा बोहोराद्वारा जारी गरिएको विज्ञप्तीमार्फत सम्पूर्ण स्वास्थ्यकर्मी र सेवाग्राहीलाई कसरी सुरक्षित बनाउने भन्ने सन्दर्भमा अस्पताल प्रशासनले व्यवस्थापनका सम्पुर्ण तयारी गरिरहेको जनाइएको छ ।
यस परिस्थितिबाट भयभित नहुन र संयमित भै सावधानी अपनाएर कोरोना भाइरसविरुद्ध जुट्न सम्पुर्ण जनसमुदायमा अस्पताल प्रशासनले विज्ञप्तीमार्फत अनुरोधसमेत गरेको छ ।
प्रतिक्रिया दिनुहोस !
