नवलपरासीमा एकै दिन थपिए ३ कोरोना संक्रमित, आइसोलेसन नहुँदा बिरामी राख्‍न अन्यौल

परासी : आइसोलेसन नहुँदा पश्चिम नवलपरासीमा देखिएका कोरोना संक्रमित बिरामीलाई राख्न अन्यौल देखिएको छ । शुक्रबार मात्र जिल्लामा एक किशोरीसहित ३ जनामा कोरोना पोजिटिभ देखिएको छ ।

जिल्लामा कोरोना संक्रमितको संख्या बढ्दै जाँदा आइसोलेसन बनाउनेतर्फ भने वास्ता गरिएको छैन । आइसोलेसन नहुँदा यसअघि देखिएका २ संक्रमितलाई भैरहवास्थित भीम अस्पताल पठाइएको थियो । 

आइसोलेसन नहुँदा अहिले देखिएका संक्रमितलाई कहाँ राख्ने भन्ने बारे अन्यौल भएको निमित्त प्रमुख जिल्ला अधिकारी जोरासिंह माझीले बताए ।' जिल्लामा आइसोलेसन नहुँदा समस्या देखिएको छ । नयाँ संक्रमितलाई कहाँ पठाउने भन्ने विषयमा छलफल हुँदै छ, 'उनले भने।

संक्रमितलाई भैरहवा र बुटवल पठाउने भनिए पनि त्यहाँ बेड अभाव हुँदा पठाउन नसकिएको स्वास्थ्य कार्यालयका प्रमुख गौरब ढकालले बताए । प्रदेश सरकारले हरेक जिल्लामा २ सय बेडको आइसोलेसन सेन्टर निर्माण गर्ने जनाएको छ । तर स्थानीय तहमा त्यसको व्यवस्थापनका लागि कुनै सहयोग नगरेकाले आइसोलेसन बनाउन समस्या भएको स्थानीय तहका प्रमुखको भनाइ छ ।

प्रमुख जिल्ला अधिकारी अध्यक्ष रहेको जिल्लास्तरीय कोभिड-१९ संकट व्यवस्थापन केन्द्रको बैठकले पाल्ही बहुमुखी क्याम्पस र शहिद स्मृति सामुदायिक अस्पताल बर्दघाटमा १÷१ सय बेडको आइसोलेसन सेन्टर बनाउने निर्णय गरेको छ । तर अहिलेसम्म बन्न सकेको छैन ।

प्रदेश सरकारले आइसोलेसन बनाउने आश्वासन दिएपनि अहिलेसम्म स्पष्ट निर्देशन र व्यवस्था नगर्दा समस्या भएको बर्दघाट नगरपालिकाका प्रमुख धीरज शर्माले बताए । एकै पटक १ सय बेडको आइसोलेसन बनाउन स्थानीय तहलाई समस्या हुने भन्दै नगरप्रमुख शर्माले छिमेकी स्थानीय तहले साझेदारी गरे सहज हुने तर्क गरे । 'जिल्लास्तरीय संकट व्यवस्थापन समितिले १ सय बेडको बनाउने निर्णय गरेको छ । तोकिएको अस्पतालमा ५० भन्दा बढी बनाउन सकिन्न । हामीले अहिले सामुदायिक अस्पतालमा १० बेडलाई व्यवस्थित गराउन थालेका छौं, 'शर्माले भने ।

शुक्रबार नगर क्षेत्रमा २ जना संक्रमित फेला परेका छन् । आइसोलेसन नहुँदा उनीहरुलाई कहाँ राख्ने भन्ने विषयमा छलफल भइरहेको रामग्राम नगरपालिका प्रमुख नरेन्द्र कुमार गुप्ताले बताए । पाल्ही बहुमुखी क्याम्पसमा १ सय बेडको आइसोलेसन राख्न जिल्ला स्तरमा निर्णय भएकाले भवनको अनुगमन गरी काम अघि बढाइने उनले बताए । 'पहिला क्याम्पसले दिन्छ की दिँदैन त्यसबारे बुझ्छौं । उपलब्ध भए तत्काल ३५ बेड राखेर आइसोलेसन सञ्चालन गर्छौं। सिसीटिभी र अन्य व्यवस्थापन गर्न केही दिन लाग्छ,' नगरप्रमुख गुप्ताले भने । प्रदेश सरकारले आइसोलेन बनाउन भने पनि व्यवस्थापनका लागि स्पष्ट निर्देशन नदिदा अन्यौल भएको गुप्ताको भनाई छ । 

पश्चिम र पूर्वी नवलपरासीमा ४ संक्रमित

पश्चिम र पूर्वी नवलपरासीमा शुक्रबार ४ जना कोरोना संक्रमित भएको पुष्टि भएको छ । जसमा पश्चिम जिल्लामा ३ र पूर्वी जिल्लामा १ जना छन् । पश्चिम जिल्लामा संक्रमित हुनेमा रामग्राम नगरपालिका-३ घोडपालीका ३३ वर्षीया पुरुष र वडा नं. १८ पम्फापुरकी १५ वर्षीया किशोरी छन् । 

उनीहरु सदरमुकाम परासीस्थित आदर्श माविको क्वारेन्टाइनमा बसेका हुन् । अर्का सुस्ता गाउँपालिका-५को बेलवानी क्वारेन्टाइनमा रहेका ३५ वर्षीया पुरुष छन् । उनी सोही वडाका हुन् । यसअघि सोही वडा र क्वारेन्टाइनमा बस्ने २६ वर्षीया पुरुषमा कोरोना देखिएपछि भीम अस्पताल भैरहवा पठाइएको छ । 

त्यसैगरी पूर्वी नवलपरासीको विनयी त्रिवेणी गाउँपालिका-६ को क्वारेन्टाइनमा बस्ने सोही वडाका ४५ वर्षीया पुरुषमा कोरोना पुष्टि भएको छ । उनलाई भरतपुर कोरोना अस्पताल पठाइएको स्वास्थ्य कार्यालय पूर्वी नवलपरासीका प्रमुख केशव चापागाईले जानकारी दिए ।

योसंगै पश्चिम नवलपरासीमा कोरोना संक्रमित हुनेका संख्या ५ पुगेको छ । भने पूर्वी जिल्लामा ३ पुगेको छ । दुवै जिल्लामा देखिएका संक्रमित भारतबाट आएका हुन् । शुक्रबार बिहानसम्म पश्चिम जिल्लामा क्वारेन्टाइनमा बस्नेको ७ सय ५७ र पूर्वी जिल्लामा १ सय ७५  छ ।