बैतडी : भारतसँग सीमा जोडिएको बैतडीको झुलाघाट नाकामा सशस्त्र प्रहरीको बिओपी स्थापना गरिएको छ। नेपाल सरकारको नीति अनुसार सीमा नाकामा सशस्त्र प्रहरीको बिओपी स्थापना गरिएको हो।
जिल्लाको भारतसँग नाका जोडिएको एक मात्र वैध नाकाको रुपमा रहेको झुलाघाटमा सशस्त्र प्रहरीको बिओपी स्थापना गरिएको सशस्त्र प्रहरी बल नेपाल नम्बर ५१ गुल्म बैतडीका प्रहरी नायव उपरीक्षक अमित सिंहले जानकारी दिए। ‘सीमा क्षेत्रको सुरक्षा, राजस्व चुहावट नियन्त्रण, भारतीय सुरक्षाकर्मीसँग समन्वय गरी अपराध नियन्त्रणका लागि बिओपी स्थापना गरिएको हो’, उनले भने।
तत्कालका लागि सशस्त्र प्रहरी नायव निरीक्षकको नेतृत्व सीमाको बिओपी सशस्त्र प्रहरी खटाइएको सशस्त्र प्रहरी नायब उपरीक्षक सिंहले बताए। उनले भने, ‘हामीले अहिले घर भाडामा लिएर बिओपी स्थापना गरेका हौँ। आफ्नै भवन बनेपछि सशस्त्र प्रहरी निरीक्षकको नेतृत्वमा टोली खटाउँछौँ।’
सुदूरपश्चिम सशस्त्र प्रहरी नायब महानिरीक्षक हरिशंकर बुढाथाकीले सीमा नाका झुलाघाट शनिबार बिओपीको उद्घाटन गरेका हुन्। बिओपी स्थापनाले सीमा सुरक्षामा सहयोग पुग्ने उनले दाबी गरे।
बैतडीका पञ्चेश्वर गाउँपालिकाको रोलघाटमा पनि सशस्त्र प्रहरीको उपस्थिति छ। अहिले कोरोना महामारी नियन्त्रणका लागि जिल्लाका अन्य ५ ठाउँमा पनि सशस्त्र प्रहरी खटाइएको सशस्त्र प्रहरी नायव उपरीक्षक सिंहले बताए। बैतडीमा भारतसँग सीमा जोडिएको ६१ किलोमिटर क्षेत्र रहेको छ।
प्रतिक्रिया दिनुहोस !
