भारतबाट आएका कालिकोटका २३ जनाको पीसीआर रिपोर्ट 'नेगेटिभ'

कालिकोट :  भारतबाट आएका कालिकोटका २३ जनाको पीसीआर रिपोर्ट नेगेटिभ आएको छ । जिल्लाको पचालझरना गाउँपालिका  ८ स्थित बिद्यामन्दस् आधारभूत विद्यालयको क्वारेन्टाइनमा राखिएका भारतबाट फर्किएका २३ जनाको पीसीआर रिपोर्ट नेगेटिभ आएको हो ।  

जिल्लामा हालसम्म जम्मा ७ सय ३५ जनाको कोरोना संक्रमणको आशंकामा पीसीआर जाँच गरिएको छ । स्वास्थ्य सेवा कार्यालय कालिकोटका अनुसार ती सबैको पीसीआर रिपोर्ट नेगेटिभ आएको हो । स्वास्थ्य सेवा कार्यालयका जनस्वास्थ्य अधिकृत तथा सूचना अधिकारी कटकबहादुर महतका अनुसार पछिल्लो समय भारतबाट फर्किएका जिल्लाको पचालझरना गाउँपालिका ८ का २३ जना स्थानीय नागरिकको स्वाब संकलन गरी पीसीआर जाँचका लागि कर्णाली स्वास्थ्य विज्ञान प्रतिष्ठानको प्रयोगशालामा सबैको रिपोर्ट नेगेटिभ आएको जानकारी दिए । उनले अहिलेसम्म जिल्लामा कुनै पनि व्यक्तिमा कोरोनाको संक्रमण नदेखिएको बताए ।  

उनका अनुसार यसअघि जिल्लाको खाँडाचक्र नगरपालिकामा १ सय १० जना, रास्कोट नगरपालिकामा ९४ जना, तिलागुफा नगरपालिकामा ७५ जना, पलाँता गाँउपालिकामा ३३ जना, पचालझरना गाँउपालिकामा १ सय जना, सान्नीत्रिवेणी गाँउपालिकामा ८६ जना, नरहरीनाथ गाँउपालिकामा ८३ जना, शुभकालिका गाँउपालिकामा ८२ जना र महाँवै गाँउपालिकामा ७१ जनाको स्वाब संकलन गरी पीसीआरजाँच गरिएको थियो । 

स्वास्थ्य सेवा कार्यालयका सूचना अधिकारी महतका अनुसार जिल्लामा ५ सय ९ जनाको र्‍यापिड टेस्ट गरिएको छ । ती सबैको पनि रिपोर्ट नेगेटिभ आएको छ ।  परीक्षण गरिएका सबैको रिपोर्ट नेगेटिभ आएकाले हालसम्म कालिकोट कोरोना मुक्त जिल्ला रहेको उनको भनाई छ । प्रमूख जिल्ला अधिकारी कृष्णचन्द्र पौडेलले पछिल्लो समय भारतबाट फर्किन थालेका मानिसहरुलाई लक्षित गरी क्वारेन्टाइनलाई व्यवस्थित बनाउन पहल गरिएको बताए ।

उनका अनुसार जिल्लाका ९ वटै स्थानीय तहसँग समन्वय गरी पछिल्लो समय विदेशबाट फर्किने व्यक्तिलाई अनिवार्य क्वारेन्टाइनमा बसाल्ने र स्वास्थ्य परीक्षण गर्ने गरिएको छ ।  जिल्लाको रास्कोट नगरपालिका प्रमुख कासीचन्द्र बरालले पछिल्लो समय भारतलगायतका विभिन्न मुलुकबाट फर्किने स्थानीय नागरिकका लागि एक हजार क्वारेन्टाइन बेडको व्यवस्था गर्न लागिएको बताए ।

उनले भने,' गाउँमा रहेका विद्यालयमा स्थानीयले क्वारेन्टाइन बनाउन नदिएपछि गाउँबाट टाढा रहेका नयाँ भौतिक संरचना नै निर्माणको कार्य सुरु गरिएको छ ।  एक सय जनाका लागि तयार भइसकेको छ । बाँकी एक हप्ताभित्र बनाइसक्ने नगरको लक्ष्य छ । जिल्लाका अन्य स्थानीय तहमा पनि भारतबाट फर्किने नागरिकलाई लक्षित गरी क्वारेन्टाइनको व्यवस्थापन गर्न थालिएको छ । जिल्लामा भारतबाट मात्र ७ हजार बढी जिल्ला भित्रिने स्थानीय सरकारको अनुमान छ ।