जाजरकोट : रुकुम पश्चिमको चौरजहारी नगरपालिका ८ सोतीमा भएको घटनामा बेपत्ता भएका ६ जनामध्ये एक जनाको शव २५ किलोमिटर तल भेरीको किनारमा फेला परेको छ । शवको पहिचान हुन सकेको छैन ।
बेहुली लिन गएका जाजरकोट भेरी नगरपालिका ४ का २१ वर्षीय नवराज विकको शव शुक्रबार बिहानै भेरी किनारमा भेटिएको थियो । मृतक नवराजकी प्रेमिका पश्चिम रुकुमको चौरजहारी नगरपालिका वडा नम्वर ८ सोतीकी १७ वर्षीया सुस्मा मल्ललाई बेहुलीको रुपमा भित्र्याउन शनिबार १९ जना युवासहित गाउँ पुगेका बेला वडाध्यक्ष वीरबहादुर मल्लसहित सोतीका गाउँलेले आक्रमण गरेर लखेट्दा नवराजको भेरी नदीमा खसेर मृत्यु भएको र अन्य ६ जना बेपत्ता भएको पीडीतले बताएका छन् ।
सुस्माले बोलाएपछि उनलाई लिन नवराजसहितको युवाको समूह सोती पुगेको थियो । उनीहरु आएका थाह पाएपछि केटीका आमाबुवाले गाउँलेलाई बोलाएर आक्रमण गरी लखेटेर हत्या गरेको पीडित पक्षको भनाइ छ । प्रहरीले घटनाबारे अनुसन्धान भइरहेको जनाएको छ ।
मृत्यु भएपछि प्रहरीले चौरजहारी नगरपालिका वडा नम्बर ८ का वडाध्यक्ष डम्वरबहादुर मल्ल, केटीका (बुवा) वीरबहादुर मल्ल र आमा प्रकाशी मल्लसहित पाँच जनालाई नियन्त्रणमा लिइएको छ । घटनामा संलग्न अन्यलाई पनि नियन्त्रणमा लिने क्रम जारी रहेको प्रहरी निरीक्षक धर्मसिंह विष्टले बताए ।
प्रहरीका अनुसार जाजरकोटको भेरी नगरपालिका वडा नम्बर ४ का गणेश विक, भेरी नगरपालिका वडा नम्बर ११ का लोकेन्द्र सुनार, गोविन्द शाही, सन्दीप विक र पश्चिम रुकुमको चौरजहारी नगरपालिकाका वडा नम्बर १ का टीकाराम सुनार बेपत्ता छन् । तीमध्ये एक जनाको शव हुन सक्ने भएकोले सल्यानको राघेचौरको प्रहरीलाई जानकारी गराएको प्रहरी नायव उपरीक्षक किशोर श्रेष्ठले बताए । प्रहरी नायव उपरीक्षक श्रेष्ठले शवको पहिचान परिवारलाई देखाएपछि मात्र हुने बताए ।नवराजसहितको युवा समूहलाई कथित तल्लो जातका केटाले ठकुरीकी छोरी भगाउन खोजेको भन्दै आक्रमण गरी लखेटेको स्थानीयको भनाइ छ । केटीपक्षले भने केटीको उमेर नपुगेको र केटीले विवाहको लागि अस्वीकार गरे पनि जर्वजस्ती लान खोज्दा विवाद भएको दाबी गरेका छन्। घटनापछि प्रहरी सम्पर्कमा गएका १२ जनामध्ये भेरी नगरपालिका वडा नम्बर ४ का सुदीप खड्का गम्भीर घाइते भएको प्रहरीले जनाएको छ ।
मृतकको शव पोष्टमार्टमका लागि जिल्ला अस्पताल ल्याइएको र घटनाबारे गहिरो अनुसन्धान भइरहेको जाजरकोटका प्रहरी प्रमुख डिएस्पी श्रेष्ठले बताए ।
प्रतिक्रिया दिनुहोस !
