बारा : बाराको महागढीमाई नगरपालिका र कलैया उपमहानगरपालिकामा एकैदिन २३ जनामा कोरोना संक्रमण भएको पुष्टि भएको छ । स्वास्थ्य तथा जनसंख्या मन्त्रालयले सोमबार प्रेस विज्ञप्ती जारी गर्दै महागढीमाई नगरपालिकामा २१ र कलैया उपमहानगरापालिकामा २ जनामा कोरोना संक्रमण भएको पुष्टि गरेको हो ।
योसंगै बारामा संक्रमितको संख्या ३९ पुगेको छ । मन्त्रालयले जारी गरेको विज्ञप्ती अनुसार किटजन्य रोग अनुसन्धान तथा तालिम केन्द्र हेटौंडामा गरिएको परीक्षणमा महागढीमाईका १८ देखि ५० वर्षसम्मका २१ पुरुषमा कोरोना संक्रमण देखिएको छ । यसैगरी राष्ट्रिय जनस्वास्थ्य प्रयोगशालामा गरिएको परीक्षणमा कलैया उपमहानगरपालिका १ कोतवालीका २५ र ३२ वर्षका पुरुषमा कोरोना भेटिएको हो ।
महागढीमाई नगरपालिकामा कोरोना पुष्टि भएका सबै पुरुष भारतबाट एक साताअघि मात्रै नेपाल प्रवेश गरेका हुन् । पचरौता नगरपालिकाको बेलदारी नाकाबाट नेपाल प्रवेश गर्ने क्रममा उनीहरुलाई नियन्त्रणमा लिएर महागढीमाई नगरपालिकाले बगवाईन माध्यमिक विद्यालयमा संचालन गरेको क्वारेन्टाइनमा राखिएको थियो ।
क्वारेन्टाइनमा रहेका ४० जनामध्ये ३० जनाको स्वाब परीक्षण गरिएको र त्यसमध्ये २१ जनामा कोरोना पुष्टि भएको बाराका प्रमुख जिल्ला अधिकारी रुद्रप्रसाद पण्डितले जानकारी दिए । संक्रमित २३ जनाको विवरण प्राप्त भएपछि उनीहरुलाई कलैया अस्पतालको क्वारेन्टाइनमा राखिने प्रजिअ पण्डितले बताए ।
महागढीमाई नगरपालिकाका प्रमुख उपेन्द्र यादवले भारतबाट नेपाल प्रवेश गरेका उनीहरुको स्वाब एक साताअघि संकलन गरी परीक्षणका लागि हेटौंडा पठाइएको जानकारी दिए । यादवले नेपाल प्रवेश गर्ने क्रममा नाकाबाटै उनीहरुलाई नियन्त्रणमा लिएर क्वारेन्टाइनमा राखिएकाले परिवार र समुदायसम्म जोखिम पुग्न नपाएको बताए । उनले क्वारेन्टाइनमा रहेका अन्यको पनि अब तत्काल तत्काल परीक्षण गर्न आवश्यक रहेको बताए ।
बगवाइनमा माध्यमिक विद्यालयको क्वारेन्टाइनमा अन्य १० जनाको परीक्षण हुन बाँकी छ । उनीहरु सबै भारतबाट आएका हुन् । महागढीमाई नगरपालिकाले संचालन गरेका तीन क्वारेन्टाइनमा ५२ जनालाई राखिएको थियो । एकैदिन थपिएका २३ सहित बारामा संक्रमितको संख्या ३९ पुगेको छ । यसअघि जिल्ला प्रहरी कार्यालयमा कार्यरत पाँच प्रहरी, सिम्रौनगढ नगरपालिकामा सात, करैयामाई गाउँपालिकामा दुई, जीतपुरसिमरा उपमहानगरपालिकामा एक, विश्रामपुर गाउँपालिकामा एक जनामा कोरोना पुष्टि भएको थियो । संक्रमितमध्ये जीतपुरसिमराका एक र सिम्रौनगढका एक जना उपचारपछि घर फर्किएका छन् ।
प्रतिक्रिया दिनुहोस !
