कुइरेपानी क्वारेन्टाइनका स्वास्थ्यकर्मीको रातारात लिइयो स्वाब

दाङ : संक्रमित भेटिएका दाङको कुइरेपानी क्वारेन्टाइनमा रहेका स्वास्थ्यकर्मी र सुरक्षाकर्मीको मध्यरातमा स्वाब संकलन गरिएको छ ।  क्वारेन्टाइनमा चरम लापरबाही भएको र संक्रमित भेटिएको ५ दिनसम्म स्वास्थ्यकर्मी र सुरक्षाकर्मीको स्वाब परीक्षण नभएको समाचार अन्नपूर्णपोष्ट डटकममा प्रकाशन भएपछि आइतबार मध्यरातमा उनीहरुको स्वाब संकलन गरिएको छ ।

क्वारेन्टाइनमा रहेका ७ जना स्वास्थ्यकर्मी र ५ जना सुरक्षाकर्मीको राती स्वाबको नमूना संकलन गरी राप्ती स्वास्थ्य विज्ञान प्रतिष्ठानमा पढाइएको घोराही उपमहानगरपालिकाका कोरोना फोकल पर्सन जनस्वास्थ्य अधिकृत विकेश रेग्मीले बताए । 

उनले उनीहरुसँग अन्य ८० जनाको समेत गरेर सोमबार बिहान ३ बजेसम्म संकलन गरिएको बताए । राती १० बजे देखि स्वाब संकलन सुरु गरिएको थियो स्वाब परीक्षणका लागि राप्ती स्वास्थ्य विज्ञान प्रतिष्ठान घोराहीमा पठाइएको छ ।

दाङको घोराही उपमहानगरपालिकाले सञ्चालन गरेको घोराही ३ मा रहेका कुइरेपानी क्वारेन्टाइनमा रहेका नागरिक र स्वास्थ्यकर्मीहरुले सामान्य सुरक्षा सामग्री समेत पाउन सकेका छैनन् ।

यो क्वारेन्टाइनमा रहेका एकजना पुरुषमा कोरोना संक्रमण देखिएको थियो । घोराही उपमहानगरपालिका ३का ती पुरुषलाई कोरोना पोजिटिभ भेटिएको भएपनि त्यहाँ रहने अरुको बारेमा भने स्थानीय सरकारले लापरवाही गरेको देखिएपछि अन्नपूर्णले त्यो विषय सार्वजनिक गरेको हो ।

क्वारेन्टाइन १८ दिनदेखि ड्युटीमा खटिएका ७ जना स्वास्थ्यकर्मी सामान्य सुरक्षा कवज पीपीई समेत नभएको गुनासा गरेका छन् भने मापदण्डअनुसारको अन्य व्यवस्था समेत नरहेको गुनासो बढी हुन थालेको छ । संक्रमित भएको क्यारेन्टाइनमा लापरवाही देखिनुले स्वास्थ्यकर्मी उच्च जोखिममा काम गरिरहेका छन्।