नवलपरासीमा भिटिएम अभाव, आरटीडी परीक्षण गरेर घर पठाउने तयारी
जेठ १३, २०७७ मंगलबार १४:५२:०
परासी : पश्चिम नवलपरासीमा भिटिएम अभाव भएपछि क्वारेन्टाइनमा बसेकाहरुको आरटीडी परीक्षण गरेर घर पठाउने तयारी गरिएको छ । जिल्लामा हरेक दिन क्वारेन्टाइनमा बस्नेको संख्या बढ्दो छ । सरकारले क्वारेन्टाइनमा बस्नेको संख्याअनुसार भिटिएम पठाउन नसकेपछि आरटीडी परीक्षण गरेर नेगेटिभ आउनेलाई घर पठाउनुको विकल्प नरहेको स्वास्थ्य कार्यालयका प्रमुख गौरव ढकालले बताए ।
मंगलबार दिउँसोसम्म जिल्लाका क्वारेन्टाइनमा बस्नेको संख्या ९ सय २१ पुगेको छ । प्रदेश सरकारले भने २ सय ८० भिटिएम पठाएको छ । करिब ६ सय ५० भिटिएम अपुग छ । 'सरकारले पठाएको भिटिएम जिल्लाका ७ स्थानीय तहमा ४० का दरले पठाएका छौं । संख्याअनुसार पीसीआर परीक्षण गर्न सकिदैन,' ढकालले भने ।
भिटिएम अभाव भएपछि १४ दिन क्वारेन्टाइनमा बसेकाको आरटीडी विधिबाट परीक्षण गर्ने र नेगेटिभ आए घर पठाउने निर्देशन भएकाले सोहीअनुसार परीक्षण गरेर घर पठाउनुको विकल्प नरहेको उनले बताए ।
आरटीडी विधिबाट गरिने परीक्षण विश्वासिलो छैन । यसअघि बर्दघाटमा गरिएको आरटीडी परीक्षणमा एकजनाको रिपोर्ट पोजिटिभ आएको थियो । पीसीआरमा भने नेगेटिभ आएको थियो । पीसीआर नगरी आरटीडी गरेर घर पठाउँदा समुदायमा कोरोनाको जोखिम बढ्ने भन्दै स्थानीयले विरोध गर्न थालेका छन् ।
जिल्लादेखि प्रदेश सरकारसँग भिटिएम उपलब्ध गराउन बारम्बार माग गरेपनि नपठाउँदा समस्या भएको सरावल गाउँपालिकाका अध्यक्ष राधेश्याम चौधरीले बताए । 'क्वारेन्टाइनमा बस्नेको संख्या बढ्दै छ । मेरो गाउँपालिकामा मात्र १ सय ७४ जना क्वारेन्टाइनमा छन् । ४० वटाले के गर्नु ? मैले जिल्ला, प्रदेश सभासद्देखि मन्त्रीसँग भिटिएम तत्काल पठाई दिनुस् भनेको छु । तर सुनुवाई भएको छैन,'अध्यक्ष चौधरीले भने, 'पीसीआर नगरी नपठाउनु भनेर गाउँलेले भनेका छन् हामीसँग छैन । सरकारले आरटीडी गरेर घर पठाउनुस् भन्छन् । के गर्ने, नगर्ने अन्यौल भएको छ ।'
अहिलेसम्म जिल्लामा ५ सय ९२ जनाको पीसीआर परीक्षण गरिएको छ । जसमा ५ जनामा पोजिटिभ देखिएको छ । भारतको उत्तर र बिहार प्रदेशसँग सीमाना जोडिएको जिल्लामा दिहुँजसो भारतबाट आउनेको संख्या बढ्दो छ । सबैभन्दा बढी सुस्ता गाउँपालिकाको क्वारेन्टाइनमा बस्नेको संख्या २ सय ५ छ ।
सरावल गाउँपालिकामा १ सय ७४, पाल्हीनन्दनमा १ सय ५२ र प्रतापपुर गाउँपालिकाको क्वारेन्टाइनमा बस्नेको संख्या १ सय ४७ छ । त्यसैगरी बर्दघाट नगरपालिकामा ९५, रामग्राम नगरपालिकामा ८६ र सुनवल नगरपालिकाको क्वारेन्टाइनमा बस्नेको संख्या ६२ जना रहेको स्वास्थ्य कार्यालयले जनाएको छ ।
प्रतिक्रिया दिनुहोस !
