राजविराज : भारतबाट आएका सप्तरीका एक महिलासहित ११ जनामा कोरोना संक्रमण देखिएको स्वास्थ्य कार्यालय सप्तरीले जनाएको छ । सप्तरीको बोदे बर्साइन नगरपालिका–५ स्थित चन्द्र नमूना माविको क्वारेन्टाइनमा बसेका १८, १९, १९, २०, २०, २१, २८ र ५६ वर्षीय पुरुष, बलान बिहुल गाउँपालिका–४ बेल्ही स्थित राष्ट्रिय प्राथमिक विद्यालयको क्वारेन्टाइनमा बसेका १७ वर्षीया महिला र २९ वर्षीय पुरुष तथा सुरुङ्गा नगरपालिकास्थित मसीलाल जनता माविको क्वारेन्टाइनमा बसेका २९ वर्षीय पुरुषमा कोरोना संक्रमण देखिएको स्वास्थ्य कार्यालय सप्तरीले जनाएको छ ।
बि.पी. कोइराला स्वास्थ्य विज्ञान प्रतिष्ठान, धरानले सप्तरीका ११ जना कोरोना संक्रमितको जानकारी पठाएको स्वास्थ्य कार्यालय सप्तरीका निमित्त प्रमुख दुनियालाल यादवले बताए । योसहित सप्तरीमा कोरोना संक्रमण पुष्टि भएका १५ जना पुगेको छ । पहिलोपटक वैशाख २९ गते डाकनेश्वरी नगरपालिका–३ का १८ वर्षीय युवकमा संक्रमण पुष्टि भएको थियो । उनीसहित १३ जना मजदुर लकडाउनका बेला चितवनबाट वैशाख ९ गते सप्तरी आएका थिए ।
त्यसपछि भारतको हरियाणाबाट आएका बलान बिहुल गाउँपालिका–४ का ३५ वर्षीय युवकको जेठ ९ गते कोरोना संक्रमण पुष्टि भएको थियो । श्रीमती र भाइसहित जेठ १ गते आएका उनी चोरबाटो हुँदै घरमा लुकिछिपी बसेकोमा गाउँलेहरुले खबर गरेपछि प्रहरीले जेठ ३ गते बलान बिहुल गाउँपालिका–४ बेल्हीस्थित क्वारेन्टाइनमा राखेको थियो ।
सोमबार डाकनेश्वरी नगरपालिका–५ पातोस्थित कन्तचन्द्र माविको क्वारेन्टाइनमा बसेका डाकनेश्वरी नगरपालिका–४ का २२ वर्षीय र वडा नम्बर ८ का ३४ वर्षीय पुरुषमा संक्रमण पुष्टि भएको मन्त्रालयले सार्वजनिक गरेको थियो । संक्रमित दुबै जना भारतको मुम्बईबाट जेठ ५ गते आएको डाकनेश्वरी नगरपालिकाका स्वास्थ्य सहसंयोजक उमेश साहले बताए । भारतबाट आए लगत्तै उनीहरुलाई पातोस्थित क्वारेन्टाइनमा राखिएको थियो ।
आज पुष्टि भएका ११ जनालाई भारतको विभिन्न राज्यबाट आएपछि विभिन्न स्थानीय तहले सञ्चालन गरेको क्वारेन्टाइनहरुमा राखिएको थियो । पछिल्लो पटक क्वारेन्टाइनमा बसेका २ सय ३८ जनाको स्वाब पठाएकोमध्ये ११ जनाको रिपोर्ट पोजिटिभ आएको र बाँकीको रिपोर्ट आउने क्रममा रहेको निमित्त प्रमुख यादवले बताए ।
संक्रमित व्यक्तिहरुलाई राजविराजस्थित गजेन्द्रनारायण सिंह अस्पतालको आइसोलेशनमा ल्याउने तयारी भइरहेको अस्पतालका डा. रणजितकुमार झाले जानकारी दिए ।
प्रतिक्रिया दिनुहोस !
