कालिकोट : कर्णाली प्रदेशमा कोरोना संक्रमित फेला नपरुन्जेलसम्म कालिकोटमा कोरोनाको त्रास निकै कम थियो । मंगलबारसम्म दैलेखमा ८ र सुर्खेतमा १५ जना गरी कर्णाली प्रदेशमै २३ जना कोरोना संक्रमित फेलापरेपछि कालिकोटमा पनि कोरोनाको जोखिम निकै बढेको छ । यसले गाँउ गाँउमा त्रास पनि बढाएको छ । पछिल्लो समय भारतबाट दैनिक सय जनाका दरले जिल्ला भित्रिने नागरिकबाट पनि कोरोनाको जोखिम बढेको हो ।
जिल्लामा तत्काल २५ प्रतिशत नागरिक आउने अनुमान गरिएको भए पनि आउने क्रमलाई हेर्दा निकै बढी छ । यही अनुसार मानिसहरु आए भने ६० प्रतिशत भन बढी मानिसहरु आउन सक्छन् । उनीहरुलाई क्वारेन्टाइनमा राख्न धौ धौ हुने अवस्था छ ।
कालिकोटका नागरिकको रोजगारीको प्रमुख गन्तव्य भारत भएकाले उनीहरु फर्कने क्रम बढेको छ । तर स्वदेश फर्कनेको व्यवस्थापनमा उचित ध्यान नदिँदा संक्रमणको जोखिम पनि बढिरहेको छ । दिन प्रति दिन मानिसको आगमन हेर्दा नगरपालिकाले व्यवस्थापन गर्न नसक्ने अवस्था आएको तिलागुफा नगरपालिका वडा नं. ५ का वडा अध्यक्ष टिकाराम न्यौपानेले बताए । उनले भने, 'जिल्ला स्तरीय डिसीएमसीको बैठकले पलाँताका नागरिक तिलागुफामा क्वारेन्टाइनमा राख्ने गरी निर्णय गर्दा थप समस्या छ । पाएक पर्ने स्थानीय तहमा जिल्लाबाट धमाधम भारतबाट आएका नागरिक भरिएका गाडीहरु पठाउन थालेका छन् । व्यवस्थापन पक्ष निकै कमजोर छ । यसले नागरिकलाई हैरानी र कोरोना संक्रमणको जोखिम पनि बढी छ ।'
स्वास्थ्य सेवा कार्यालय कालिकोटका जनस्वास्थ्य अधिकृत कटकबहादुर महतले भारतबाट फर्किएका सबै मानिसहरुको स्वाब संकलन गर्नका लागि भिटिएम अभाव रहेको बताए । उनले भने, 'हामीले भारतबाट फर्किएका मानिसलाई क्वारेन्टाइनमा राखेको तीन दिनमा पहिलो चरण र १३ दिनमा दोस्रो चरणको स्वाब संकलन गरी परीक्षण गर्छौं । तर हामीसँग जिल्लामा ९ हजार नागरिक भित्रिने अनुमानका आधारमा १८ हजारभन्दा बढी भिटिएम आवश्यक पर्छ । अहिले नै हामीसँग भिटिएम अभाव छ ।'
उनका अनुसार भारतबाट आएका प्रायः नागरिक गाउँबासी भएका कारण सहरभन्दा गाउँमा जोखिम बढ्न थालेको छ । बजार क्षेत्रमा सुरक्षा निकायले लकडाउन कार्यान्वयन गराए पनि गाउँमा सुरक्षा जनशक्ति कम छ । भारतबाट आउने मानिसको सम्बन्ध सहरभन्दा गाउँमा बढी देखिन्छ । जसका कारण गाउँमा बढी खतरा रहेको स्थानीय बताउँछन् ।
प्रतिक्रिया दिनुहोस !
