सुर्खेत : कर्णाली प्रदेशमा कोरोना संक्रमितको संख्या ४६ पुगेको छ । बिहीबार दैलेखमा आठ जना नयाँ कोरोना संक्रमित थपिएसँगै कर्णालीमा कोरोना संक्रमितको संख्या ४६ पुगेको हो । यसअघि दैलेखमा ८ र सुर्खेतमा ३० जनामा कोरोना भाइरस संक्रमण पृष्टी भएको थियो ।
कर्णाली प्रदेश सामाजिक विकास मन्त्रालयका अनुसार बिहीबार कोरोना भाइरस पृष्टी भएका थप आठ जना सबै नारायण नगरपालिका दैलेखका हुन् । जसमा नारायण नगरपालिकाका एक बालक, एक महिलासहित ६ जना पुरुष रहेका छन् । वडा नम्बर–१ का २६ वर्षीय पुरुष, वडा नम्बर–३ का १९, ३०, ३६, ४० वर्षीय पुरुष, वडा नम्बर–४ का वर्ष एकका बालक र वर्ष २० की महिला र वडा नम्बर–५ का १७ वर्षीय पुरुषमा कोरोना संक्रमण पृष्टी भएको हो ।
यस्तै बुधबार मात्रै सुर्खेतका थप १५ जनामा कोरोना पृष्टी भएको थियो । कोरोना संक्रमित यी सबै व्यक्तिहरु भारतबाट फर्किएका हुन् । बुधबार पृष्टी भएका थप १५ जना संक्रमितमध्ये वीरेन्द्रनगर नगरपालिका–१० जना तीन जना महिला र सात जना पुरुष रहेका छन् । भने सुर्खेतकै चौकुने गाउँपालिकाका दुई जना महिला र एकजना पुरुष रहेको प्रदेश अस्पताल कालागाउँका निर्देशक डाक्टर डम्बर खड्काले बताए ।
भारतको गुजरातबाट मंगलबार वीरेन्द्रनगर आएर मृत्यु भएका एक युवकको कोरोना रिपोर्ट पनि नेगेटिभ आएको छ । सुर्खेतको अवलचिंग घर भएमा ती युवाको मंगलबार राती निधन भएको थियो । ‘हामीले स्वाब जाँच गर्न प्रयोगशालामा पठाएका थियौं', डाक्टर खड्काले भने, ‘उनको मृत्यु बाथरोगका कारण भएको पुष्टी भयो । कोरोना संक्रमण भएको देखिएन ।’
प्रतिक्रिया दिनुहोस !
