कालिकोट : विश्वभरी महामारीका रुपमा फैलिएको कोरोना भाइरसको संक्रमण दिनप्रति दिन बढिरहेका बेला काला पहाडबाट फर्किएका मजदुरबीच बाटोमा ठगिएका छन् । गाउँमा रोजगारी नपाएपछि परिवार पाल्नकै लागि भारत गएका मजदुर कोरोनाको त्रासपछि गाउँ फर्किँदा बीच बाटोमा ठगिएका हुन् ।
भारत जाँदा चार महिना अगाडि जिल्लाको शुभकालिका गाउँपालिका र नरहरीनाथ गाउँपालिकाको सिमाना जिते बजारबाट महेन्द्रनगरसम्म गाडीमा ९ सय भाडा तिरेर गएका मानिस फर्किँदा प्रतिव्यक्ति २ हजार ४ सय भाडा तिरेका छन् ।
बिहीबारसम्म जिल्लाका विभिन्न स्थानीय तहका १ हजार ४ सय मानिस भारतबाट फर्किएका छन् । उनीहरु सबैले महेन्द्रनगरबाट जितेसम्मको भाडा २ हजार ४ सयका दरले तिरेका छन् ।
जितेबजारबाट स्थानीय तहसम्म लिनका लागि स्थानीय सरकारले थप भाडा तिरेका छन् । परिवारको एक सरो कपडा फेर्न र जीवीका चलाउन काला पहाड गएका मजदुरलाई यातायात भाडामा मार परेको छ ।
जिल्लाको पचालझरना गाउँपालिका ७ का जंगबिर ऐडीले भने, 'बढीमा एक हजार भाडा तिर्नुपर्ने बाटोमा २ हजार ४ सय तिरेर घर फर्कियौँ । महेन्द्रनगरमा गाडी चड्दै गर्दा भाडाको कुरा उठायौं। गाडीवालाले प्रतिव्यक्ति २ हजार ४ सय दिनुपर्छ भने । हामी एउटै गाडीमा ४५ जना कोचिएर बसेका थियौँ । भाडा बढी भयो भनेर प्रहरीलाई भन्यौँ । तर प्रहरीले पनि लकडाउनका वेला गाडी नै नपाइने अवस्था रहेको भन्दै मागेजति भाडा तिर्नु भनेर जवाफ दिए ।'
उनले भने, 'परिवारका सबै जनाको शरीरमा एकसरो कपडा फेर्न र खान नपुग्ने महिनामा चामल किनेर परिवारको छाक टार्न प्रदेश गएका हौं। महामारी बढ्दै गएपछि भारत सरकारले नेपालीलाई घर पठाउन थाल्यो । हामीले पनि घर सम्झिएर फर्कियौँ । रिजर्व गाडीमा दुवै तिरको भाडा लिदा पनि १ हजार ८ सय लिनुपथ्र्यो । दोहोरो ट्रिपको भन्दा पनि ६ सय बढी भाडा लगियो। हामी ठगियौँ । '
यस्तै अर्का स्थानीय बिर्ख संज्यालले प्रहरी प्रशासनकै निगरानीमा संचालित गाडीले भाडामा आफूहरुलाई ठगी गरेको बताए । उनले भने, 'पहिले सामान्य अवस्थामा सस्तो भाडामा यात्रा गरियो । अहिले विपद्का बेला प्रहरी प्रशासनले निगरानी गरि छुटाएका गाडीमा ठगियौँ । जति भाडा हो त्यति लिनुपथ्र्यो ।'
महेन्द्रनगरदेखी जितेबजारसम्मको भाडा दरमा तीन गुणा बढी भाडा लगियो । हामीहरुले यसबारे प्रहरीकहाँ गुनासो व्यक्त गरेपनि सुनुवाइ भएन् । यस्तै तिलागुफा नगरपालिका ५ का वडा अध्यक्ष टिकाराम न्यौपानेले दैलेखको राकमसम्म २ हजार २ सय तिरेर आएका स्थानीय नागरिकलाई नगरपालिकाको केन्द्र गाल्जेसम्म प्रतिव्यक्ति १ हजार २ सय थप भाडा मागियो। गाडीवालासँग बार्गिनिङ गरेर एक हजार थप भाडा तिर्नु पर्यो । उनले भने,' प्रहरी प्रशासनले यस विषयमा चासो दिएन् । भाडामा आम नागरिक मारमा परेका छन् ।
प्रतिक्रिया दिनुहोस !
