कालिकोटका कोरोना संक्रमितलाई उपचारका लागि सदरमुकाम ल्याइँदै
जेठ १८, २०७७ आइतबार १५:६:०
कालिकोट : कालिकोटका १७ जना र बाजुराका एकजना गरी १८ जना कोरोना संक्रमितलाई तिलागुफाबाट उपचारका लागि जिल्ला सदरमुकाम मान्म ल्याउने तयारी गरिएको छ ।
उनीहरुको तिलागुफाबाट सदरमुकाम मान्म ल्याउने तयारी भइरहेको प्रमुख जिल्ला अधिकारी कृष्णचन्द्र पौडेलले बताए । उनका अनुसार जिल्ला सदरमुकामस्थित निर्माणाधिन एकिकृत भवनमा सुरक्षित राखेर उनीहरुको उपचार गर्ने तयारी गरिएको हो ।
शनिबार मात्र कर्णाली स्वास्थ्य विज्ञान प्रतिष्ठान जुम्लामा पीसीआर जाँच गर्दा जिल्लाको शुभकालिका गाउँपालिकाका १२ जना र महाँवै गाउँपालिकाका ५ जना र एकजना बाजुराका व्यक्तिमा पहिलो पटक कोरोना पुष्टि भएको थियो ।
उनीहरु सबै तिलागुफा नगरपालिकास्थित सत्यदेवी माविमा नगरपालिकाले व्यवस्थापन गरेको क्वारेन्टाइनमा राखिएका थिए । उनीहरु सबै भारतबाट एउटै गाडीमा आएका थिए ।
कोरोना पुष्टि हुनेहरुमा कालिकोटको शुभकालिका गाउँपालिका ५ का १९, ५०, २६, २१, ४०, २२, २४, ३५, २२, वर्षका र वडा नं. ४ का २०, २२, २० वर्षीय पुरुषमा संक्रमण देखिएको छ ।
यस्तै, कालिकोट महावै-२ का ४२, २१ वर्षीका पुरुष, वडा नं. ७ का ५२, ३३ वर्षीय पुरुष, वडा नं. ५ का २० वर्षीय पुरुषमा संक्रमण देखिएको छ । यस्तै हाल तिलागुफा नगरपालिकाको सत्यादेवी माविमा क्वारेन्टाइनमा रहेका बाजुराको जगनाथ गाउँपालिकाका एकजना पुरुषमा पनि कोरोना पुष्टि भएको छ । उनीहरु सबैको स्वास्थ्य अवस्था सामान्य छ ।
जिल्लामा हालसम्म जम्मा १ हजार ४ सय ८ जनाको कोरोना संकास्पद मानिसको स्वाब संकलन गरिएको छ । जिल्लाको ९ वटै स्थानीय तहबाट शनिबारसम्म कोरोना परीक्षणका लागि १ हजार ४ सय ८ जनाको स्वाब संकलन गरिएको हो ।
स्वास्थ्य सेवा कार्यालयका जनस्वास्थ्य अधिकृत तथा सूचना अधिकारी कटकबहादुर महतका अनुसार स्वाब संकलन गरिएका मध्ये७ सय ३५ जनाको कोरोना संकास्पद व्यक्तिको सीआर रिपोर्ट नेगेटिभ आइसकेको छ । सूचना अधिकारी महतका अनुसार १८ जनामा कोरोना पुष्टि भएको छ । बाँकीको स्वाब परीक्षणका लागि कर्णाली स्वास्थ्य विज्ञान प्रतिष्ठान पठाइएको छ ।
जिल्लामा हालसम्म भारतबाट आएका मात्र १ हजार ६ सय ९४ मानिस क्वारेन्टाइनमा राखिएका छन् । करीब ४ सय जना आइरहेको बताइएको छ।जिल्लामा भने भिटिएम अभाव छ।
सूचना अधिकारी महतका अनुसार जिल्ला अस्पतालमा चार बेडको मात्र आइसोलेसन छ । प्राथमिक स्वास्थ्य केन्द्र कुमालगाँउमा ५ बेडको छ । रास्कोट सामुदायिक अस्पतालमा ४ बेड र महाँवै गाउँपालिकामा २ बेड गरी १५ बेडको आइसोलेसन छ ।
जिल्ला सदरमुकामस्थित एकिकृत भवनमा ५० बेडको आइसोलेसन बनाउने तयारी छ । प्रदेश सरकारले एक करोड बजेट पनि उपलब्ध गराइसकेको छ ।जिल्लामा भेन्टिलेटर र आइसीयुको सुविधा छैन् ।
प्रतिक्रिया दिनुहोस !
