जोमसोम : मुस्ताङको थासाङ गाउँपालिका -४ घासामा शनिबार कोरोना परीक्षण क्लिनिक संञ्चालनमा आएको छ ।पोखरा देखि म्याग्दीहुँदै मुस्ताङ प्रवेश गर्ने मालबाहक तथा निर्माण सामग्री लिएर मुस्ताङ आउने सवारी साधनका चालक र सहचालकको अनिवार्य कोरोना परीक्षण गराउने उद्देश्यले आरडीटी परीक्षण क्लिनिक संञ्चालनमा ल्याइएको हो ।
पछिल्लो समय विश्वव्यापी महामारीको रुपमा फैलिएको कोरोना भाइरस ( कोभिड-१९ ) को संक्रमण जिल्लामा फैलिन थालेपछि जिल्लामा कोरोना रोकथाम तथा नियन्त्रण गर्न उच्च सर्तकता अपनाइएको हो ।
छिमेकी जिल्ला म्याग्दीमा कोरोना संक्रमण देखा पर्न थालेपछि स्थानीय तह र स्थानीयको माग अनुसार जिल्ला कोभिड-१९ संकट व्यवस्थापन समितिले आरडीटी क्लिनिक संञ्चालनमा ल्याएको मुस्ताङका सिडिओ वेदप्रकाश अर्यालले जानकारी दिए ।
मुस्ताङको थासाङ-४ को हाइड्रो पावरको खाली जग्गामा क्लिनिक राखिएको छ । क्लिनिकलाई चाहिने बिजुली ,पानी र सुरक्षाको प्रबन्ध घासास्थित बज्रदल गणको नेपाली सेनाले जिम्मा लिएको छ ।
क्लिनिमा आवश्यक पर्ने फर्निचर थासाङ-४ वडाले गर्ने र टेन्टको व्यवस्था प्रदेश सरकारले गरेको छ । यस्तै, जिल्ला स्वास्थ्य कार्यायल तथा जिल्ला अस्पताल जोमसोमले जिल्ला भित्रिने सवारी साधनका चालक तथा सहचालको कोरोना परीक्षण गर्न आरडीटी किट ,ग्लोब्स ,माक्स र सेनेटाइजरको व्यवस्था गरेको छ भने क्लिनिकलाई चाहिने प्राविधिक जनशक्ति जिल्ला अस्पतालले गरेको सिडिओ अर्यालले जानकारी दिए ।
क्लिनिक सञ्चालनपछि मुस्ताङ आउजाउ गर्ने सवारी चालक तथा सहचालकले अनिवार्य आरडीटी परीक्षण गराई रिपोर्ट लिएर मात्र जिल्ला प्रवेश गर्न पाउने व्यवस्था मिलाइएको सिडिओ अर्यालले उल्लेख गरे ।
जिल्ला कोभिड-१९ संकट व्यवस्थापन समितिले मुस्ताङ जिल्लामा विकास तथा पूर्वाधार निर्माण लगायतका काम गर्न १४ बुँदे सर्त पालना गर्न निर्माण व्यवसायीलाई अनुरोध गरेको छ ।
जिल्ला समितिले तोकेको मापदण्डमा रही काम गर्ने प्रतिबद्धता जनाएपछि मात्रै विकास निर्माणको काम गर्न दिने व्यवस्था गरिएको सीडीओ अर्यालले जानकारी दिए ।
निर्माण व्यवसायीले जिल्लामा कामदार ल्याउँदा कोरोना परीक्षण गर्नुपर्ने र तोकिएको सर्तका आधारमा कामदारलाई संक्रमण नफैलिने स्थानमा व्यवस्थापन गर्नुपर्ने जनाइएको छ । विकासको काम गर्दा निर्माणस्थलको अवस्थाका बारेमा दैनिक सुपरिवेक्षण गर्दै त्यसको रिपोटिङ समितिलाई बुझाउनुपर्ने छ । समितिले तोकेको नियममा रही काम गर्र्न हालसम्म ४ कम्पनीले अनुमती लिएका छन् । अमित बिल्डर्स, इलाईट संकरमाली जेभी ,बिरुवा कन्ट्रक्सन र कन्टेक कान्छाराम कोशी एण्ड न्यापानेले स्थानीय प्रशासनको अनुमती लिएका हुन् ।
यस्तै , मुस्ताङमा जिल्ला बाहिरबाट फलफुल ,तरकारी र मासुजन्य पदार्थ आयात गर्न प्रतिबन्ध लगाईएको छ । संक्रमित जिल्लाबाट फलफुल तथा तरकारी र मासजन्य पदार्थ भित्रिने सक्ने जनाउँदै कोभिड-१९ संकट व्यवस्थापन समितिले आइतबारदेखि जिल्ला भित्र्याउन प्रतिबन्ध लगाएको हो । समितिले संकमण देखिएका जिल्लाबाट खाद्यान्न ल्याउन नपाउने जनाएको छ । थासाङ-४ का वडाध्यक्ष विशाल शेरचनले जिल्लाबाहिरबाट फलफूल तथा तरकारी आयात गर्ने रोक लगाइएको बताए ।
प्रतिक्रिया दिनुहोस !
