पूर्वी नवलरासीमा थप ३ जनामा कोरोना संक्रमण, उपचारका लागि जिल्ला अस्पताल लगियो

नवलपुर : पछिल्लो पटक पूर्वी नवलपरासीमा देखिएका ३ जना कोरोना संक्रमितलाई उपचारका लागि जिल्ला अस्पतालमा पठाइएको छ । सोमबार एक १४ वर्षीया किशोरसहित २ जना पुरुषमा कोरोना संक्रमण भएको पुष्टि भएको हो । 

संक्रमितलाई मध्यविन्दु जिल्ला अस्पताल डण्डाको आइसोलेसनमा पठाइएको स्वास्थ्य कार्यालयका प्रमुख केशव चापागाईले जानकारी दिए । अस्पतालमा ५ बेडको आइसोलेसन छ । ३ जना संक्रमित राखेसँगै अस्पतालको आइसोलेसन भरिएको छ । यसअघि देखिएका संक्रमितमध्ये २ जना पनि अस्पतालकै आइसोलेसनमा छन्।  

प्रसूति र जटिल किसिमका बिरामीबाहेक अस्पतालको अन्य सेवा बन्द रहेको चापागाईले जानकारी दिए । योसँगै जिल्लामा कोरोना संक्रमतिको संख्या ९ पुगेको छ । अन्य एकजना कोरोना संक्रमित युवती निको भएर घर फर्किसकेकी छिन्।

सोमबार कोरोना संक्रमित हुनेमा कावासोती नगरपालिका-१ र १२ का २२ र ३६ वर्षीया पुरुष छन् । १४ वर्षीय किशोर विनयी त्रिवेणी गाउँपालिका-३ का हुन् । भारतबाट आएका उनीहरुको अवस्था सामान्य छ । संक्रमित किशोर ८ जनाको समूहमा र अन्य अर्को समूहमा आएका हुन् । अन्य ४५ जनाको रिपोर्ट आउन बाँकी छ । 

जिल्लामा दिनप्रतिदिन कोरोना संक्रमित देखिन थालेपछि आइसोलेसन अभाव हुन थालेको छ।' चोरमारा प्राथमिक स्वास्थ्य केन्द्र र पितौजीघाट हेल्थ पोष्टमा ३÷३ गरी ६ आइसोलेसन वेड छन् । तर हरेक दिन संक्रमित थपिदै गएकाले  तत्काल कम्तिमा ५० बेडको आइसोलेसन आवश्यक छ । त्यसका लागि छलफल भइरहेको छ, 'चापागाईले भने । जिल्लामा १ हजार ५० जना क्वारेन्टाइन छन् । उनीहरुसबै भारतबाट आएका हुन्। दिनहुँ भारतबाट आउनेको संख्या बढ्दो छ ।