सुनवल नगरपालिकाले बनायो टेलिभिजन सुविधासहितको आइसोलेसन
जेठ २०, २०७७ मंगलबार ११:१०:०
परासी : पश्चिम नवलपरासीको सुनवल नगरपालिकाले टेलिभिजनसहितको आइसोलेसन सेन्टर निर्माण गरेको छ । नगरपालिका क्षेत्रमा रहेको बाल सिकाइ केन्द्रको भवनमा २५ बेडको आइसोलेसन निर्माण गरिएको नगर प्रमुख भीम बहादुर थापाले बताए ।
आर्थिक बोझ कम गर्न नगरपालिकाले सहयोगी दाताबाट बेड सहयोग मागेको हो । आइसोलेसनमा रहेका सबै बेड बुटवलको एक स्वास्थ्य संस्थाले सहयोगस्वरुप उपलब्ध गराएको हो ।
बेड मात्र नगरपालिकाले खरिद गरेको हो । आइसोलेसन निर्माण गर्न १ लाख ३१ हजार लागेको प्रमुख प्रशासकीय अधिकृत रामलाल श्रेष्ठले जानकारी दिए ।आइसोलेसनमा महिलाका लागि ३ र पुरुषका लागि २२ बेड बनाइएको छ। प्रोटिनलगायतका नेपाल सरकारले उपलब्ध गराएका अन्य औषधिको व्यवस्था गरिएको छ ।
कोरोनाको पोजिटिभ रिर्पोट आएका तर लक्षण नदेखिएका आइसोलेसनमा बस्ने छन् । उनीहरु आफैले खाना नास्ता बनाएर खानका लागि छुट्टै भान्सा कोठा बनाइएको छ ।
मनोरञ्जनका लागि टेलिभिजन र वाइफाइको व्यवस्था गरिएको छ । आइसोलेसनमा नगरपालिकाका स्वास्थ्यकर्मी र अन्य १९ जना भोलेन्टिएर चिकित्सकले सेवा दिने व्यवस्था मिलाइएको नगर प्रमुख थापाले बताए ।
उनीहरु अहिले रुपन्देहीका अस्पतालमा भोलेन्टिएर गर्दै आएका छन् । 'सुनवल नगरपालिकाबाट एमबीबीएस गरेका गरेका १९ जना चिकित्सक छन् । 'उहाँहरु सबैले आइसोलेसनमा हरेक दिन एकजना बस्ने गरी सहयोग गछौं भन्नु भएको छ । उहाँहरुको सहयोगमा स्वास्थ्य सेवा उपलब्ध गराउने छौं, 'नगरप्रमुख थापाले भने,'स्थानीय तहले आइसोलेसन बनाउन ठूलै कसरत गर्नुपर्ने अवस्था नगरेको थापाको भनाइ छ । '
रकम अभाव भए सहयोगी दातालाई अनुरोध गर्न सकिन्छ । यस्तो बेला सबैले सहयोग गर्न तत्परता देखाउँछन् । २५ बेडले नपुगे अरु बेड तत्काल निर्माण गर्न सकिने गरी व्यवस्था मिलाइएको छ थापाले बताए।
प्रदेश सरकारले हरेक स्थानीय तहलाई आइसोलेसन निर्माण गर्न निर्देशन दिएपनि अन्य स्थानीय तहले अहिलेसम्म निर्माण गर्न सकेका छैनन् । तर रामग्राम नगरपालिकाले निर्माण सुरु गरेको छ । अन्य स्थानीय तहले भने त्यसको सुरुवात समेत गरेका छैनन् । जिल्लामा ३ नगरपालिका र ४ गाउँपालिका छन् ।
अहिलेसम्म ६ जना संक्रमित भएका छन् । ३ जना उपचारपछि घर फर्केका छन् । भारतबाट आउनेको संख्या बढ्दै जानु र संक्रमित फेला पर्न थालेपनि अन्य स्थानीय तह भने आइसोलेसन निर्माणमा उदासिन छन् । आइसोलेसन नहुँदा जिल्लामा देखा परेका संक्रमितलाई भैरहवा र बुटवल पठाउनु पर्ने बाध्यता छ ।
प्रतिक्रिया दिनुहोस !
